Muklat kag militante nga ginapaslaw sang mga pamatan-on kag estudyante ang pagtilaw nga pagpasilabot sang National Task Force-Elcac kag mga bayaran nga traidor sa rebolusyonaryong kahublagan sa mga unibersidad sa tabon sang mga “porum” kag “akademikong talakayan.”

Sa UP Mindanao, nag-walkout ang mga lider-estudyante sa kampus sa porum sang TAGBO 2025 sadtong Oktobre 26 tungod sa pagsingit kag paghambal ni Arian Ramos, traidor sa rebolusyonaryong kahublagan kag isa sa masupog nga tigpangapin sang NTF-Elcac kag Armed Forces of the Philippines. Si Ramos, upod sang iya mga kapareho nga mga traidor, ang nagapanguna sa Red-tagging sang lehitimo nga mga organisasyon estudyante kag ila mga lider. Nagdala pa si Ramos sang “bodyguard” nga ahente sang paniktik nga nagtuga sang grabe nga kahangawa sa mga estudyante.

Gindayaw sang Council of Student Leaders sang unibersidad ang ginhimo nga pag-walkout sang mga estudyante. Ginbatikos man nila ang administrasyon sang UP Mindanao nga nagpahanugot sang panghitabo nga suno sa ila indi isa ka “isolated” nga insidente. Suno sa ila, laragway ini sang mga “kahuyangan sang institusyon” nga sadto pa nila ginabatikos. Masobra 30 ka organisasyon pang-estudyante sang UP Mindanao ang nagpirma sa pahayag sang CSL.

Sa UST, napaatras sang kolektibo nga pagkundenar sang mga estudyante ang kuntani partisipasyon sang NTF-Elcac sa porum nga “Preventing Terror Grooming: The Philippine Experience.” Suno sa mga progresibo nga grupo sa kampus, ang pag-imbitar sa ahensya pagtapak sa dungog sang unibersidad kag sa mga Tomasino nga ginapakig-away ang kamatuoran.

Sadtong Nobyembre 5, nagpatigayon sang protesta ang mga estudyante sa kampus bilang pagrehistro sang pagbatikos sa NTF-Elcac kag sa porum. Bisan napaatras ang NTF-Elcac, nagserbe pa gihapon nga bisita kag taghambal sa porum sadtong Nobyembre 6 ang tiglawas sang National Security Council, kag traidor nga si Arian Ramos. Nakigdebate sa ila kag nagpanindugan kontra Red-tagging ang isa ka aktibista sa UST.