Mapagdesisyon nga gin-uungbawan han Katipunan ng mga Gurong Makabayan (Kaguma) an mga kaluyahan ngan kasaypanan hini ha naglabay nga mga tuig, ha inspirasyon han kagiusan pagtutul-id han rebolusyunaryo nga kagiusan. Pamatuod hini an paglansar han rebolusyunaryo nga grupo han mga magturutdo han ira Ika-upat nga Nasyunal nga Kongreso hadton Oktubre.

Nagtirok an diri mamenos ha 79 nga kaapi tikang ha mga tsapter han Kaguma tikang ha magkalain-lain nga rehiyon, akademiko nga institusyon ngan unibersidad ha sektor han edukasyon para ha kongreso. Nagkaurusa an mga delegado ha tema nga “Sulong rebolusyunaryo nga kagiusan magturutdo! Magtul-id! Magpahiluag! Makigbisog! Magdaug! Bug-os kusog nga ipasulong an demokratiko nga rebolusyon han katawhan nga may sosyalista nga perspektiba!”

Masobra duha kadekada na an nakalabay tikang han iglansar an urhi nga kongreso han grupo. An mga syahan hini nga kongreso iginhimo hadton 1985, 1987 ngan 2003. Naitukod an grupo hadton Marso 28, 1971.

“Utro nga ibangon an Kaguma, maisugon nga magpahiluag ngan magpakusog ha bug-os nga nasud. Pursigido nga ipasulong an mga komprehensibo nga buruhaton para ha rebolusyon,” sigon ha Nasyunal nga Sekretaryat ha report hini ha pagtitikang han kongreso.

Ha katitirok, iginreport han sekretaryat an sumada han Kaguma ha kalugaringon nga organisasyon ha nakalabay nga duha kadekada. Landaw dinhi an mapainubsanon nga pagsuson ha kalugaringon ha pagbul-iw ha batakan nga prinsipyo han rebolusyunaryo nga organisasyon ngan ha mga pamaagi hini ha nakalabay nga mga tuig.

Napinal ngan napagkaurusahan han kongreso an mga importante nga dokumento han Kaguma kalakip an oryentasyon, batakan balaud ngan tulo katuig nga taktikal nga plano hini. Ginbalayan ha kongreso an unom nga resolusyon nga maggigiya ha dirudiretso nga pag-abante han organisasyon.

Nag-eleher liwat an kongreso han bag-o nga Nasyunal nga Kongreso ngan Nasyunal nga Komite nga Tagapagpatuman nga matindog nga pamunuan han organisasyon ha bug-os nga nasud. Ginpili hi Guia Umili komo tagapangulo ngan tagapagyakan han Kaguma.

Ginkalipay han National Democratic Front of the Philippines ngan han Partido Komunista ng Pilipinas an desisyon ngan pagpupursige han Kaguma ha paglansar han Ika-upat nga Nasyunal nga Kongreso hini.

“Naglalaum kami nga hini nga kongreso makokonsolida niyo an iyo ranggo, makakapurot han mga leksyon tikang ha mga eksperyensya, ngan mas madig-on nga maabante ha pagpatuman ha mga buruhaton ha pagpakusog han rebolusyunaryo nga ranggo han mga magturutdo,” pahayag ni Elian Dipasupil, pankabug-usan nga sekretaryo han NDFP.

Sigon kan Marco Valbuena, puno nga upisyal ha impormasyon han PKP, diri madidiwara nga makasaysayan an nahilansar nga kongreso, diri la tungod kay nahilansar ini kahuman an hilaba nga panahon, kundi tungod kay segurado nga pag-abre ini han bag-o nga panahon han pagpasulong ha mas hitaas nga balitang han rebolusyunaryo nga kagiusan magturutdo.

Sering ni Valbuena, an Kaguma nagseserbe nga kapawa para ha mga magturutdo nga nahatag lamrag ha dalan nga kinahanglan nira hasugon para makab-ot an katuyuanan nira ngan han bug-os nga katawhan. “Ha iyo pagpupursige, gintagan niyo han inspirasyon an mga magturutdo agud mag-inaw lahos ha presente nga kakurian, ngan makig-usa ha pakigbisog han mas hiluag nga katawhan para hul-os nga bag-uhon an sistema pankatilingban,” mensahe niya ha Kaguma.

Ha paghuman han kongreso, duruyog nga utro nga nagsumpa an mga kaapi ngan mga bag-o nga naeleher nga pamunuan nga ginsundan han panserra nga pamulong han tagapangulo. Ha iya mensahe, ginkilala ngan ginpasidunggan han tagapangulo nga hi Umili an mga martir han sektor ngan han katawhan. “Hira nga naghalad ngan naghatag han bug-os nga kinabuhi para ha rebolusyon. Pasidunggan naton an mga kasama naton nga aada ha kabaryuhan ngan nakatin han hitaas ng porma han pakigbisog,” sering niya.

Nagbilin hin ayat ha mga delegado han kongreso hi Umili: “Hinaot padayon nga kumusog an sumpayan han aton rebolusyunaryo nga teorya ngan praktika; hinaot an mga dokumento ngan mga pag-aram diri magigin hunong nga kahibaruan nga nakabiaw la ha aton mga hunahuna kundi magin giya ha pagpapauswag han aton paggios; ngan an aton paggios naman maduso ngadto ha mas hitaas nga balitang an aton rebolusyunaryo nga teorya.”