Desaysibo nga ginpangibabawan sang Katipunan ng mga Gurong Makabayan (Kaguma) ang mga kahuyangan kag kasaypanan sini sa nagligad nga mga tuig, sa inspirasyon sang kahublagan panadlong sang rebolusyonaryong kahublagan. Pamatuod sini ang paghiwat sang rebolusyonaryong grupo sang mga manunudlo sang ila Ika-apat nga Pungsodnon nga Kongreso sadtong Oktobre.

Nagtipon ang indi magnubo sa 79 ka katapo halin sa mga tsapter sang Kaguma halin sa lain-lain nga rehiyon, akademiko nga institusyon kag unibersidad sa sektor sang edukasyon para sa kongreso. Naghiliusa ang mga delegado sa tema nga “Sulong rebolusyonaryong kahublagan sang mga manunudlo! Manadlong! Magpalapad! Maghimakas! Magmadinalag-on! Ubos-kusog nga isulong ang demokratikong rebolusyon sang banwa nga may sosyalistang perspektiba!”

Masobra sa duha ka dekada na ang nagligad halin sang ilunsar ang ulihi nga kongreso sang grupo. Ang mga una sini nga kongreso ginhiwat sadtong 1985, 1987 kag 2003. Natukod ang grupo sadtong Marso 28, 1971.

“Liwat nga bangunon ang Kaguma, makahas nga magpalapad kag magpabaskog sa bug-os nga pungsod. Pursigido nga isulong ang mga kumprehensibo nga katungdanan para sa rebolusyon,” suno sa Pungsodnon nga Kalihiman sa report sini sa pagsugod sang kongreso.

Sa pagtililipon, gin-report sang kalihiman ang mga pagsuma sang Kaguma sang kaugalingon nga organisasyon sa nagligad nga duha ka dekada. Unod diri ang mapainubuson nga pagsaway sa kaugalingon sa pagbuhi sa sandigan nga prinsipyo sang rebolusyonaryong organisasyon kag sa mga pamaagi sini sa nagligad nga mga tuig.

Napinal kag nakasugtan sang kongreso ang importante nga dokumento sang Kaguma lakip ang oryentasyon, konstitusyon kag ang tatlo ka tuig nga taktikal nga plano sini. Ginbalay sa kongreso ang anum ka resolusyon nga maga-ubay sa tayuyon nga pagsulong sang organisasyon.

Nagpili man ang kongreso sang bag-o nga Pungsodnon nga Konseho kag Pungsodnon nga Komiteng Tagpatuman nga magatindog nga pamunuan sang organisasyon sa bug-os nga pungsod. Ginpili si Guia Umili bilang tsirman kag tagpamaba sang Kaguma.

Ginpanginbulahan sang National Democratic Front of the Philippines kag sang Partido Komunista ng Pilipinas ang desisyon kag pagpursige sang Kaguma sa paghiwat sang Ika-apat nga Pungsodnon nga kongreso sini.

“Nagalaum kami nga sa kongreso nga ini makonsolida ninyo ang inyo kubay, makakuha sang mga pagtulun-an halin sa mga inagihan, kag mas malig-on nga magsulong sa pagpatuman sa mga katungdanan sa pagpabaskog sang rebolusyonaryong kubay sang mga manunudlo,” pahayag ni Elias Dipasupil, heneral nga sekretaryo sang NDFP.

Suno kay Marco Valbuena, pinuno nga opisyal sa impormasyon sang PKP, matuod nga makasaysayan ang nalunsar nga kongreso, indi lang tungod nahiwat ini pagkatapos sang malawig nga panahon, kundi tungod segurado nga magabukas ini sang bag-o nga panahon sa pagsulong sa mas mataas nga lebel sang rebolusyonaryong kahublagan manunudlo.

Suno kay Valbuena, ang Kaguma nagaserbe nga silak para sa mga manunudlo nga nagahatag sang kasanag sa banas nga dapat nila usuyon para maagum ang handum nila kag sang bug-os nga pungsod. “Sa inyo pagpanikasog, ginahatagan ninyo sang inspirasyon ang mga manunudlo para magtan-aw lapaw sa subong nga mga kabudlayan, kag makig-isa sa paghimakas sang malapad nga pumuluyo agud lubos nga bag-uhon ang sosyal nga sistema,” mensahe niya sa Kaguma.

Sa pagtapos sang Kongreso, ululupod liwat nga nagsumpa ang mga katapo kag mga bag-o nga napilian nga pamunuan nga ginsundan sang pangtapos nga paghambal sang tsirman. Sa iya pamulong-pulong, ginkilala kag ginpasidunggan sang tsirman nga si Umili ang mga martir sang sektor kag sang pumuluyo.”Sila ang naghalad kag nagbubo sang bug-os nga kabuhi para sa rebolusyon. Saluduhan naton ang mga kaupod naton nga yara sa kaumhan, kag nagatungod sang mataas nga klase sang paghimakas,” suno sa iya.

Nagbilin man sang hangkat sa mga delegado sang kongreso si Umili: “Kabay padayon nga magbaskog ang angtanay sang aton rebolusyonaryong teorya kag praktika; kabay ang mga dokumento kag mga pagtuon indi mangin nakapondo nga kinaalam nga nakatago lang sa aton mga panghuna-huna kundi mangin ubay sa pagpauswag sang aton paghulag; kag kabay nga ang aton paghulag iduso padulong sa mas mataas nga lebel sang aton rebolusyonaryong teorya.”