Dapat ubos-kusog nga batikuson kag pakigbatuan ang gintukod nga Task Force Philippines sang imperyalistang US nga gamiton sini sa labi nga pagpasilabot militar sa pungsod. Sa pagtukod sang Task Force Philippines, mas garapal nga ginakontrol sang US ang Armed Forces of the Philippines (AFP) kag iban pa nga pwersang pangseguridad sang estadong neokolonyal para magserbe sa heyopulitikal nga interes sang US sa Asia.

Ang Task Force Philippines isa ka bag-o nga yunit militar sang US nga nakabase sa Pilipinas. Tuyo sini nga italana ang direksyon, plano kag mga operasyon sang AFP sa “depensa pangluwas” halin sa South China Sea tubtob sa Luzon Strait, batuk sa kuno “pangpwersa kag agresibo” nga hulag sang China sa kadagatan.

Dako nga kabulaskugan ang deklarado nga katuyuan sini nga “mas paayuhon ang pagbuligay sang US kag Pilipinas.” Kaladlawan nga gin-ako mismo sang hepe sang AFP nga wala siya sang ihibalo sa detalye kabahin sa plano sang task force nga ini sang US. Ang nahibaluan lang niya amo nga santo ini sa konsepto kag operasyon sang Task Force Ayungin nga gintukod sang US sadtong nagligad nga tuig.

Gintukod ang nauna nga task force nga ini sadtong 2024 kag gintukod sang mga opisyal militar sang US. Ini ang nagaplano sang mga operasyon “resupply” sang AFP sa barko sini nga BRP Sierra Madre nga nagapundo sa Ayungin Shoal. Ginpadala sang US ang iya kagamitan militar kag hinganiban, kag ginsuportahan ang iya sarbeylans pagkahawaan kag pagkahitaasan (satellite). Sa malip-ot nga pulong, ang mga “resupply mission” sang AFP mga operasyon pangkadagatan nga direkta nga mando kag kontrol sang US.

Ang pagtukod sang Task Force Philippines pinakaulihi nga padihot sang imperyalistang US kag marka sang mataas nga lebel sang pagpasilabot sa pungsod. Nagaserbe ini sa balayon sang Indo-Pacific Strategy sang US sa tuyo nga palibutan ang imperyalistang karibal sini nga China, kag punggan ang labi nga pag-uswag sang gahum sini sa militar kag ekonomiya.

Pila ka tuig na nga ginagamit kag ginagatungan sang US ang konplikto pang-kadagatan sang Pilipinas kag China, agud hatagan sang rason ang pag-gamit sang Mutual Defense Treaty kag iban pa nga mga indi patas nga kasugtanan militar para pabaskugon ang presensya sang mga pwersang militar sini sa Pilipinas. Gintukod sini ang indi magnubo sa siyam ka base militar sang US nga ginakilala sa idalum sang Enhanced Defense Cooperation Agreement (EDCA).

Mas madamo pa ang wala gina-ako nga base kag pasilidad sang US sa lain-lain nga bahin sang pungsod, lakip ang ginatukod nga pasilidad sang AFP sa Mavulis island sa Batanes para gamiton sang US. May presensya man ang militar sang US sa mga pasilidad sa Ilocos Norte, sa Aurora, Quezon, Mindoro, Panay,kag lain-lain nga bahin sang Palawan. Ginatawuhan ang mga ini sang mga opisyal kag soldado nga Amerikano, ukon ginatambakan sang mga hinganiban kasubong sang Typhon missile system kag iban pa nga mga pangdugmok nga armas. Plano man sang US nga tukuron sa pungsod ang mga pabrika sang bala, drone kag iban pa nga armas. Dugang pa diri ang plano sang US nga tukuron ang refuelling depot sa malapad nga kadagatan sang Davao Gulf.

Permanente man ang presensya sa kadagatan nga sakop sang Pilipinas sang mga barko pang-gyera sang US,lakip ang mga higante nga aircraft carrier nga sakay ang linibo ka soldado nga Amerikano. Hilway ini nga nagapalawod kag nagadungka sa bisan diin man nga bahin sang Pilipinas. Ginagamit ang mga ini sa sunod-sunod kag sampaw-sampaw nga ginalunsar nga paghanas sa gyera sa Pilipinas, nga lunsay nagatutok sa senaryo sang paglupok sang gyera sa China.

Bat-ulan nga ido-ido si Marcos sa iya imperyalistang amo nga US. Mas pa siya nga nangin sunod-sunoran tungod sa desperasyon nga kuhaon ang suporta sang US. Ini sa atubang sang naga-indakal nga pang-pulitika nga krisis tuga sang nabuyagyag nga higante nga mga kaso sang korapsyon kag nagapadayon nga lapnagon nga kahublagan protesta batuk sa iya rehimen.

Sa sinapol sini lang sang ASEAN, si Marcos ang nagaserbe nga tigdala sang adyenda sang US, kag ginaduso ang suno sa iya “enhanced defense cooperation” sang mga pungsod sa Southeast Asia batuk sa “peligro kag agresyon” sang China. Nasupalpal si Marcos sang wala ni bisan isa ang nagsuporta sang iya gin-proponer.

Santo sa mando sang US, sunod-sunod nga ginpasulod ni Marcos ang mga kasugtanan nga “visiting forces” sa Japan kag Canada, nga lunsay mga pungsod may alyansa militar sa US. Tuyo sini nga pahanugutan nga gamiton sang mga pungsod nga ini ang teritoryong pangdagat kag kadutaan sang Pilipinas para sa mga kaupod-sang-US nga mga operasyon militar. Subong naman ginapabugal ni Marcos nga mabakal siya sang mga kagamitan pang-gyera sa US agud kuno makapakig-away sang isa ka bulan antes mangayo sang bulig sa iban nga pungsod.

Kapareho sa adyenda ni Marcos, nagahulag ang lain-lain nga maka-US nga partido, organisasyon, mga institusyon kag kabahin sang mas midya para suportahan ang nagadako nga presensya militar sang US sa Pilipinas, sa tabon sang pagdepensa sa “West Philippine Sea.” Ang mga ini lunsay ginapondohan sang imperyalistang US nga naga-agi sa mga institusyon kaangay sang National Endowment for Democracy kag naga-agi sa grupo kaangay sang “INCITEgov.” Sadtong 2023, nagtalana man ang gobyernong US sang $1.6 bilyon para sa 5-tuig programa para sa “propaganda nga kontra-China”.

Ginapaypayan nila ang Sinophobia ukon ang pagka-ugot sa tanan nga may kahilabtanan sa China. Kasubong ni Marcos, ginapaguwa nila nga may peligro sang “pagpangsakop” kag “agresyon” sang China, apang wala nagahambal kon paano ang Pilipinas nagapabilin nga neokolonya sang imperyalismong US. Ginapaguwa nila nga “maka-China” ang sin-o man nga nagapamatok sa mga pagpasilabot militar sang US sa Pilipinas.

Nagapostura subong ang mga Duterte nga kontra-US agud tabunan ang hambalanon sang korapsyon nga imbolbado ang ila pamilya. Wala sang unod ang postura nga ini. Sang yara pa sa poder, wala sang ginhimo si Rodrigo Duterte agud ipasira ang mga EDCA site kag lubos nga ibasura ang VFA kag mga kasugtanan militar sa US. Ginhilway niya ang soldado nga Amerikano nga nagpatay kay Jennifer Laude. Hipos subong ang mga Duterte sa plano sang US nga tukuron ang refuelling depot sa Davao Gulf.

Sa atubang sang nagabaskog nga duso sang US para mangsulsol sang gyera kag ganuyon ukon gamiton ang Pilipinas sa pagpang-gyera batuk sa China, hugot ang kinahanglanon nga maghiliusa ang pumuluyo agud maghulag para punggan kag pakigbatuan ini.

Dapat pabaskugon ang singgit sang banwa para wasakon ang tanan nga base militar sang US, kuhaon ang tanan nga mga misayl sang US sa mga sekreto nga lokasyon sa Pilipinas, kag palayason ang nagapasilabot nga mga pwersa militar sang US sa pungsod. Dapat iangot ang singgit nga ini sa paghimakas sang pumuluyo para mahilway sa kuko sang imperyalistang nagapangdagit, angkunon ang independensya kag tukuron ang pungsod nga hilway kag mauswagon.