Padayon nga gina-target sang militar kag pulis ang mga mangunguma sa isla sang Panay kag Negros sang nagligad nga mga semana agud kugmaton ang mga komunidad kag magsabwag sang terorismo.

Sa Negros Occidental, ginpatay sang militar ang babaye nga mangunguma nga si Joan Escuadro sadtong Nobyembre 3 sang gab-i. Ginsulod sang mga ahente sang militar ang iya balay kag malapitan siya nga ginluthang.

Sa Bago City, padayon ang pagpang-ipit sang pulis sang Negros Occidental District Jail-Male Dormitory sa mga bilanggong pulitikal kag lider nga nagpakigbato sa pagpang-abuso sang napalayas apang nakabalik sa poder nga si warden Maj. Crisysrel Awe. Arbitraryo nga ginbartolina si Lorenzo Perolino sugod Oktobre 26 sang hapon.

Sa Iloilo City, gin-aresto sang pulis ang 67 anyos nga si “Mayok” sa Barangay Buntatala, Jaro sadtong Nobyembre 3. Ginpasakaan siya sang sampaw-sampaw nga mga kaso kag ginapasibangdan nga mataas nga opisyal sang rebolusyonaryong kahublagan. May patong siya nga ₱2.55 milyon.

Samtang, gin-aresto sang mga pulis kag militar ang organisador sang mangunguma kag tumandok nga si Marlene Espiritu samtang nagabyahe sa Mabalacat City, Pampanga sadtong Nobyembre 1. Ginapasibangdan siya nga mataas nga opisyal sang BHB Central Luzon kag ginpasakaan sang lima ka kaso nga kriminal.

Sa Davao City, gindagdagan sang 30-adlaw nga suspensyon sang Ombudsman sadtong Oktobre 20 ang kapitan sang Barangay Bucana 76-A nga si Robert Olanolan tungod sa iya pakigbato sa demolisyon sa Kabacan kag Times Beach halin pa Enero 2024. Nagaatubang si Olanolan sang reklamo nga grave abuse nga ginpasaka sang DMCI nga plano nga magpatindog sang negosyo sa lugar.