Sa gabay ng kilusang pagwawasto, tuluy-tuloy ang pagsisikap ng Komiteng Rehiyon ng Partido Komunista ng Pilipinas sa Isla ng Negros para palalimin at palawakin ang pag-ugat nito sa masang Negrosanon. Noong 2025, iniulat ng komite ang relatibong pangingibabaw sa natukoy na mga kahinaan. Bunga nito, matagumpay na napamunuan ng Partido ang mga pakikibaka ng masang anakpawis at mga demokratikong sektor sa mga syudad, bayan, at kanayunan, at ang pagpapalakas ng mga yunit ng Bagong Hukbong Bayan (BHB) sa limang larangang gerilya sa isla.

Pagpapanday sa ideolohiya

Mapagpasyang nagpatupad ang komite ng mga simpleng pamamaraan ng pagtuturo habang napananatiling malaman ang mga pag-aaral para konsolidahin ang mga kasapi ng Partido. Nakapaglunsad ito ng mga pag-aaral sa Batayan at Intermedyang Kurso ng Partido. Tuluy-tuloy din ang kampanya para pag-aralan ang Kursong Oryentasyon at Konstitusyon ng Partido.

Kolektibo ring inaral ng mga Partidista ang mga memorandum at advisory ng nakatataas na mga organo at ng rehiyon. Nagbigay ito ng liwanag sa pagkilos at pagpapatupad ng mga plano, batay sa kongkretong kalagayan ng digmang bayan sa isla at sa buong bansa.

Binasa at sama-samang tinalakay ang pambansa, panrehiyon at antas larangan na mga rebolusyonaryong pahayagan, dyornal at folio tulad ng Ang Bayan, Rebolusyon, Ang Paghimakas, Ispading, Ang Budyong at Ngurob. Nakatulong ito sa pagpapalawak ng kaisipan ng mga kasapi ng Partido sa loob ng hukbo at mga lokal na organisasyong masa.

Isang tampok na tagumpay sa nagdaang taon ang mga paglalagom na binuo ng mga komite sa larangang gerilya at iba pang mga yunit at organo ng Partido. Halimbawa nito ang paglalagom ng Komiteng Larangan sa Central Negros sa karanasan nito mula 2008 hanggang 2023. Gabay ito ngayon ng namumunong mga kadre para sa pagbubuo ng mga plano.

Nabuo rin ng mga larangang gerilya ang kani-kanilang SICA (Social Investigation and Class Analysis o Panlipunang Pagsisiyasat at Pagsusuri sa Uri) na naging gabay sa pagmumulat, pag-oorganisa at pagpapakilos sa mga pakikibakang masa. “Ito ang kongkretong anyo ng pagsisikap na malampasan ang sakit ng suhetibismo sa ideolohiya sa anyo ng empirisismo,” ayon sa komiteng rehiyon.

Iniulat ng komite ang regular na mga pagtatasa at pagbubuo ng malaman na mga plano para tiyakin ang konsolidasyon ng mga yunit ng Partido sa kanayunan at kalunsuran. Kasabay ng mga ito, matapat na isinagawa ang pagpuna at pagpuna-sa-sarili para pahigpitin pang lalo ang pagkakaisa ng Partido.

Gawain sa pulitika

Naitaas ang kamulatan sa pulitika at kahandaang lumaban ng masa sa mga pampulitikang pag-aaral. Nagpatupad ang Partido ng pinasimpleng mga pamamaraan at madaling maunawaang mga kurso ng pag-aaral ng kurikulum ng Pambansa-Demokratikong Paaralan (Padepa), ng mga isinulat na artikulo, panlipunang imbestigasyon, at mga dokumento ng paglalagom ng rebolusyonaryong karanasan.

Noong 2025, malakas na naipamalas ng masa sa kanayunan at kalunsuran ang kanilang pagkakaisa. Naibwelo sa kanayunan ang kolektibong pakikibaka para sa reporma sa lupa, pagtutulak ng makatarungang sahod at benepisyo ng mga manggagawang-bukid at maralitang magsasaka. Sa kalunsuran, tampok ang mga pagkilos laban sa jeepney phaseout, pribatisasyon ng serbisyo sa tubig, at ang malakas na kilusang kontra korapsyon.

Sumigla rin ang anti-pasistang pakikibaka ng masa laban sa rehimeng US-Marcos. Napapanahon at maagap na naglabas ng pahayag ang mga yunit sa isla para ilantad ang kasinungalingan, saywar at black propaganda ng rehimeng Marcos at mga tauhan nito. Nailabas ang mga ito sa radyo, dyaryo, sa midya sa internet at sa social media.

Sa armadong pakikibaka, aktibong nakapanatili ang limang larangang gerilya sa isla sa ilalim ng Panrehiyong Kumand sa Operasyon ng BHB (Apolinario Gatmaitan Command). Tuluy-tuloy na pinalawak ang milisyang bayan bilang reserbang pwersa para sa digmang bayan sa hanay ng baseng masa.

Dahil sa masipag, masigasig, at matalinong pagsusuri sa sitwasyong militar, malaya at tuluy-tuloy na nakapagpatupad ng rebolusyonaryong gawain ang Partido at BHB. Lumawak at lumaki ng 33% ang eryang namamaniobrahan at nakikilusan ng BHB. Lumaki ng 20% ang lakas ng organisadong masa. Palihim na naitatag ang mga organo ng kapangyarihang pampulitika sa mga kanayunan ng isla.

Nakapaglunsad ang hukbong bayan ng 44 na iba’t ibang tipo ng taktikal na opensiba. Ang ilan sa mga ito ay nailunsad sa mga sentro ng populasyon at mga lugar na malapit sa kapitolyo ng mga prubinsya sa isla. Sa mga ito, hindi bababa sa 58 ang napatay habang 21 ang nasugatan sa tropa ng militar, pulis, mga pwersang kontra-rebolusyon at masasamang elemento. Sa panig ng hukbong bayan, naitala ang limang depensibang aksyon. Namartir sa mga ito ang 10 mga kasama.

Sa tuluy-tuloy na pagpapatupad sa mga gawaing ito, nakapagrekrut ng mga bagong kasapi ng Partido na umabot sa halos 70% sa buong isla. Walang pag-aalinlangan nilang tinanggap ang kanilang mga tungkulin at responsibilidad na pamunuan ang rebolusyonaryong kilusan sa isla.