Narekord sa lain-laing bahin sa nasud ang mga kaso sa pagdagit, Red-tagging, pagpamig-ot, ug pagpasaka og hinimu-himong kaso batok sa mga mag-uuma, mamumuo ug tigpanalipud sa tawhanong katungod.

Pagdagit. Gidagit sa mga elemento sa 47th IB si Lolly Alperto, 60-anyos, mag-uuma, samtang namupo og kape duul sa iyang balay sa Sityo Agpapataw, Barangay Binobohan, Guihulngan, Negros Oriental niadtong Enero 31. Nataho nga gipaulanan og bala sa mga sundalo si Alperto ug gibanabanang nasamdan ayha siya gidagit. Hangtud karon, wala pa gihapon siya nakita sa iyang pamilya.

Pagdakop ug pagpasaka og kaso. Gidakop sa mga gwardya ug sa PNP-Cabuyao ang 21 ka mag-uuma nga nagalunsad og kampuhan sa Sityo Veinte-Veinte Cuatro, Barangay Casile, Cabuyao, Laguna niadtong Pebrero 7. Gibabagan sa mga mag-uuma ang pagpangilog sa ilang yuta sa Laguna Estates Development Corporation, gipanag-iyahan sa pamilyang Yulo. Gikasuhan sila og “trespassing” apan gibasura gilayon sa piskalya. Ginaangkon sa kumpanya ang 24-ektaryang yuta sa barangay.

Sa Bulacan, giaresto sa mga elemento sa PNP-San Jose Del Monte (SJDM) si Engineer Even Calajate niadtong Pebrero 11, usa sa testigo batok sa kumpanyang Primewater. Giakusahan siya og perjury (pagpamakak sa usa ka gipanumpaang pamahayag) sa lima ka suporter ni Rida Robes, meyor sa SJDM. Ang kaso kalabot sa iyang nahimong testimonya sa Senado niadtong Nobyembre 2025 dihang maglunsad kini og pangpublikong imbestigasyon mahitungod sa palpak nga serbisyo sa Primewater.

Pagpamig-ot. Duha ka lalaking nakasibilyan nga nagpailang mga sundalo ang miadto sa balay ni Eduardo Capuyan, retiradong organisador sa mga mamumuo sa Southern Mindanao Region niadtong Pebrero 10. Giinteroga siya kalabot sa pipila ka mga indibidwal nga ginapangita sa militar.

Sa Caloocan City, pugos nga gisulod ug gikawatan ang upisina sa Gabriela-Caloocan niadtong Pebrero 17. Gidagit nila ang projector, mga polyeto nga pagagamiton unta sa anibersaryo sa EDSA sa Pebrero 25, ug uban pa. Giransak sa mga suspek ang upisina. Unang gisulod ug gipailalum sa sarbeylans ang upisina sa grupo sa mga nagpailang pulis niadtong Oktubre 28, 2025.

Red-tagging. Sa Albay, gikan Pebrero 8, napansin ang pagkaylap sa mga poster sa NTF-Elcac diin gi-Red-tag ang mga progresibong lider ug grupong Bicolano sa palibot ug sulod sa mga unibersidad ug eskwelahan. Lakip sa biktima si Julius Espadero, bise presidente sa ACT Bicol Union.