Gibutyag ni Rep. Antonio Tinio sa ACT Teachers Partylist ang pipila ka detalye sa korapsyon nga gikalambigitan ni Ferdinand Marcos Jr kalabot sa maanomalyang mga proyekto sa flood control. Sa usa ka pamulong sa Kongreso niadtong Pebrero 10, gisaysay niya nga personal niyang nakita ang binayloay og mensahe ni Marcos ug Adrian Bersamin, kanhing pangulo sa Presidential Legislative Liaison Office, nga nagsilbing “suluguon” ni Marcos sa mga transaksyon. Si Bersamin mao ang apo sa pag-umangkon sa kanhing executive secretary ni Marcos nga si Lucas Bersamin.

Nahitabo ang binayloay og mensahe sa tunga-tunga sa Disyembre 2024 hangtud Hulyo 2025, sa panahong gimando ni Marcos ang pagsingit sa mga proyektong nagkantidad og ₱100 bilyon sa badyet alang sa 2025. Sentral sa bayloay ang paghatud ni Bersamin og ₱8 bilyong kikbak nga nasutang gigamit ni Marcos sa eleksyong 2025. Una nang gibutyag sa kanhing undersecretary sa Department of Public Works and Highways nga si Roberto Bernardo nga naghatud siya og ₱8 bilyon kang Bersamin ug sa kanhi undersecretary sa edukasyon nga si Trygve Olivar. Sa mga mensaheng gipakita kang Tinio, gipahibalo ni Bersamin kang Marcos nga “kumpleto na” ang paghatud sa maong kantidad niadtong Marso 2025.

Niadtong Hulyo 2025, pipila ka adlaw ayha ang state of the nation address (SONA) ni Marcos diin gikastigo niya ang mga kongresista sa pagsulting “maulaw pud mo” lambigit sa mga proyektong flood control, midawat siya og dugang ₱2 bilyong kikbak na gihatud ni Bersamin sa gipalit ni Marcos nga balay sa Forbes Park.

Ang maong impormasyon naggikan kang Rep. Leandro Leviste nga una nang nagbutyag nga aduna siyay gunit nga mga bidyo ug affidavit gikan sa mga Bersamin nga magpamatuud sa mga panghitabo. Gipaambit niya ang mga ebidensya sa mga representante sa Makabayan, Liberal Party ug uban pang grupo.

Tungod sa pagduhaduha ni Leviste nga ipubliko ang maong mga bidyo ug mensahe, wala kini nalakip sa impeachment complaint nga gihaon batok kang Marcos. Gibasura na ang maong reklamo niadtong Pebrero 10, kung kanus-a gihikyad ni Tinio ang mga ebidensyang nakolekta ni Leviste.