Nahirekord ha magkalain-lain nga parte han nasud an mga kaso han pagsikmit, Red-tagging, pan-gigipit, ngan pagsalawad han hinimu-himo nga kaso kontra ha mga parag-uma, trabahador ngan tag-undong han tawhanon nga katungod.

Pagsikmit. Ginsikmit han mga elemento han 47th IB hi Lolly Alperto, 60-anyos, parag-uma, samtang namimitas han kape hirani ha iya balay ha Sityo Agpapataw, Barangay Binobohan, Guihulngan, Negros Oriental hadton Enero 31. Nahireport nga ginpauranan han bala han mga sundalo hi Alperto ngan gintatantiya nga nasamaran antes hiya sikmiton. Hasta yana waray pa gihap hiya mahiaagian han iya pamilya.

Pagdakop ngan pagsalawad han kaso. Gindakop han mga gwardya ngan han PNP-Cabuyao an 21 nga parag-uma nga naglansar han kampuhan ha Sityo Veinte-Veinte Cuatro, Barangay Casile, Cabuyao, Laguna hadton Pebrero 7. Gintitipahan han mga parag-uma an panlulupot ha ira tuna han Laguna Estates Development Corporation, pananag-iya han pamilya Yulo. Ginkasuhan hira han “trespassing” kundi dagmit liwat nga iginbasura han piskalya. Gin-aangkon han kompaniya an 24 kaektarya nga tuna ha barangay.

Ha Bulacan, gin-aresto han mga elemento han PNP-San Jose Del Monte (SJDM) hi Engineer Even Calajate hadton Pebrero 11, usa ha mga testigo kontra ha kompaniya nga Primewater. Gin-aakusaran hiya han perjury (pagbinuwa ha usa nga ginsumpaan nga pahayag) han lima nga tagasuporta ni Rida Robes, meyor han SJDM. An kaso kasumpay han iya nagin testimonya ha Senado hadton Nobyembre 2025 han maglansar ini hin pampubliko nga imbestigasyon hiunong ha palpak nga serbisyo han Primewater.

Pan-gigipit. Duha nga lalaki nga nakasibilyan an nagpakilala nga mga sundalo an kinadto ha balay ni Eduardo Capuyan, retirado nga organisador han mga trabahador ha Southern Mindanao Region hadton Pebrero 10. Gin-interoga hiya kasumpay han pira nga mga indibidwal nga ginbibiling han militar.

Ha Caloocan City, pwersahay nga ginsulod ngan ginkawatan an upisina han Gabriela-Caloocan hadton Pebrero 17. Gindara hini an projector, mga polyeto nga gagamiton ha anibersaryo han EDSA ha Pebrero 25, ngan iba pa. Ginransak han mga kriminal an upisina. Syahan nga ginsulod ngan ginpailarum ha sarbeylans an upisina han grupo han mga nagpakilala nga pulis hadton Oktubre 28, 2025.

Red-tagging. Ha Albay, tikang Pebrero 8 nakit-an an pagsarang han mga poster han NTF-ELCAC diin gin-Red-tag an mga progresibo nga lider ngan grupo nga Bicolano ha palibot ngan sakob han mga unibersidad ngan eskoylahan. Kaupod ha biktima hi Julius Espadero, bise presidente han ACT Bicol Union.