Bunga sa walay hunong nga pakigbisog sa katawhan sa Dupax del Norte, Nueva Vizcaya batok sa pagsulod sa Woggle Corporation sa ilang komunidad, napugos ang Mines and Geosciences Bureau nga imando niadtong Pebrero 5 ang temporaryong suspensyon sa permit sa eksplorasyon sa kumpanya. Ginasulting hinungdan niini mao ang “force majeure” o panghitabong wala sa kontrol sa naggunit sa permit. Lakip sa mga panghitabo ang pagtukod sa barikada, hugot nga pagbabag ug nagtunhay nga tensyon tali sa mga residente ug kumpanya.

Bisan aduna nay kamandoon, gipadayon pa gihapon sa kumpanya ang eksplorasyon. Niadtong Pebrero 17, sa tabang sa PNP, gipagawas sa kumpanya ang mga makina niini ug gidala sa DENR ang mga mineral sample nga nakuha gikan sa baryo.

Niadtong Pebrero 12, nagprotesta ang gatusan ka residente, grupong pangkinaiyahan, tawong-simbahan ug mga tigsuporta sa pakigbisog sa mga taga-Dupax. Gihimo ang protesta sa kapitolyo sa Nueva Vizcaya aron ipanawagan ang hinanaling kanselasyon sa permit sa eksplorasyon sa kumpanya.

Gilunsad ang protesta atol sa pagdungog sa pito ka tigpanalipud sa kinaiyahan nga giaresto human ang bangis nga pagbungkag sa barikada niadtong Enero 23. Sa pagdungog, sa makitawhanong konsiderasyon, gibawi sa RTC branch 30 ang kamandoan niini nga gipaesplekar ang pito ka residente sa Dupax del Norte kung nganong dili sila angay pasakahan og kasong indirect contempt (paglapas sa mando sa korte).

Niadtong Pebrero 16, gitukod sa UP Diliman ang Defend Nueva Vizcaya Movement. Misalmot dinhi ang mga lider sa komunidad sa Dupax del Norte, grupong pangkinaiyahan, mga katutubo, tawong-simbahan, akademikong institusyon, ug mga indibidwal aron panalipdan ang kinaiyahan, natural nga bahandi ug katungod sa katawhan sa Nueva Vizcaya.