Sa milabayng mga semana, naglunsad og mga asembliya ug protesta kontra korapsyon ang mga progresibong grupo isip pag-andam sa dakung protesta sa Pebrero 25, ika-40 anibersaryo sa panag-alsang EDSA. Panawagan sa mga aktibidad ang pagpanubag sa tanang nalambigit gikan sa pinakatumoy.

Niadtong Pebrero 14, gipasiugdahan sa Kilusang Bayan Kontra Kurakot (KBKK) ang asembliya sa kapin 50 ka organisasyon sa University of the Philippines-Diliman sa Quezon City. Nagpadala og mensahe sa pakighiusa sa asembliya si Bishop Gerardo Alminaza, pangulo sa Caritas Philippines ug nangulo sa Catholic Bishops’ Conference of the Philippines Episcopal Commission on Social Action. Niadtong adlawa usab, laing panagtapok ang gilunsad sa STOP Corruption Alliance sa Davao City.

Duha ka Black Friday Protest, niadtong Pebrero 13 ug 20, ang gihimo sa mga alyadong organisasyon sa KBKK. Adunay mga protesta sa upat ka syudad sa National Capital Region, Baguio City, Bulacan, Laguna, Cavite, Batangas, Cebu, Iloilo, ug sa Tacloban City.

Niadtong Pebrero 20, gibawalan sa mga lokal nga upisyal sa Quezon City ang mga progresibong grupo nga maglunsad og rali sa EDSA ug manawagang pakanaugon si Marcos sa gahum.