Nagpadayag og pagsupak ang mga residente sa MacArthur, Leyte batok sa pagmina og blacksand sa Mac-Arthur Ironsand Project Corporation (MIPC) sa ilang lungsod niining Pebrero. Nagpaluyo sa operasyon ang dinastiyang Romualdez nga adunay kontrol usab sa uban pang magun-ubong mina sa Eastern Visayas.

Ang MIPC usa ka kontraktor sa Strong Built Mining Development Corporation (SBMDC). Niadtong 2007, gitanyagan sa Mines and Geosciences Bureau-Region 8 ang SBMDC og 25-ka-tuig nga Mineral Production Sharing Agreement (MPSA) langkub ang 7,411 ektaryang yuta sa mga lungsod sa Dulag, Mayorga, MacArthur, Javier ug Abuyog. Ang SBMDC gipalit niadtong 2024 sa Bright Kindle Resources & Investments Inc, kumpanyang gipanag-iyahan ni Martin Romualdez, ig-agaw ni Ferdinand Marcos Jr, kanhing Speaker, ug kongresista sa unang distrito sa Leyte.

Supak ang mga residente sa operasyong mina tungod kay paggagub-on niini ang mga umahan ug mga sistema sa irigasyon nga kritikal sa produksyon sa pagkain. Adunay mga taho usab nga ginabawalan ang pipila ka mag-uuma nga makasulod sa kaugalingon nilang yuta. Niadtong 2022, natukmod na sa panaghiusa sa mga residente ang temporaryong pagpahunong sa operasyon sa MIPC-SBMDC.

Sa wala pa misulod ang MIPC-SBMDC sa MacArthur, nagmina na og blacksand ang Nicua Mining Corporation sa lungsod. Gihiloan niini ang Lake Bito tungod kay nadap-og sa danaw ang lana ug uban pang kemikal gikan sa minahan. Pipila ka beses usab nga namatay ang tone-toneladang isda ug uban pang bahandi sa danaw. Niadtong 2012, nagbarikada ang mga taga-Barangay Villa Imelda ug Barangay Liwayway batok sa operasyon.