Nagprotesta ang mga grupong mag-uuma ug mamumuong-panguma atubangan sa Department of Agriculture sa Quezon City isip pagdumdum sa ika-7 nga anibersaryo sa pagbalaod sa liberalisasyon sa importasyon sa bugas niadtong Pebrero 13.

Gikan 2019 hangtud 2026, midaku ang importasyon sa bugas gikan 2.57 milyong tonelada ngadto sa kapin 5 milyong tonelada. Nagresulta kini sa pagkahagba sa presyo sa humay, gikan sa abereyds nga ₱20 kada kilo niadtong 2018 ngadto sa ₱14-₱16 kada kilo sa misunod nga mga tuig. Nagresulta kini sa pagkalugi sa mga mag-uuma, pag-ubos o paghunong sa pagtanum ug labaw nga pagkalubong sa utang tungod sa gasto sa produksyon ug kawalay igong suporta gikan sa estado.

Niadtong Pebrero 10, nagprotesta sa Quezon City ang mga myembro sa Anakpawis Partylist isip pagkundena sa walay hunong nga pagsaka sa presyo sa lana ug pakigkunsaba sa rehimeng US-Marcos sa kartel sa lana.

Niadtong Pebrero 17 misaka ang presyo sa gasolina og ₱1.20/litro ug ₱0.60/litro sa diesel ug kerosin. Gikan sa pagsugod sa tuig, netong misaka ang presyo sa gasolina (₱4.20/litro), diesel (₱7/litro) ug kerosin (₱5/litro).

Nagtaho usab ang Petron nga midaku ang kita niini og 37% o ₱9.7 bilyon niadtong Nobyembre 2025. Samtang naghakop og bilyun-bilyon ang mga kumpanya sa lana, patung-patong ang pagpaantus nila sa masang naghago.