Nalista sa lain-lain nga bahin sang pungsod ang mga kaso sang pag-abdak, Red-tagging, pagpang-ipit, kag pagpasaka sang himo-himo nga kaso batuk sa mga mangunguma, mamumugon kag tigtib-ong sang tawhanon nga kinamatarung.

Pag-abdak. Gin-abdak sang mga elemento sang 47th IB si Lolly Alperto, 60-anyos, mangunguma, samtang nagapamupo sang kape malapit sa iya balay sa Sityo Agpapataw, Barangay Binobohan, Guihulngan, Negros Oriental sadtong Enero 31. Nareport nga ginpaulanan sang bala sang mga soldado si Alperto kag ginabana-bana nga napilasan antes siya gin-abdak. Tubtob subong wala pa gihapon siya nakit-an sang iya pamilya.

Pagdakop kag pagpasaka sang kaso. Gindakup sang mga gwardya kag sang PNP-Cabuyao ang 21 ka mangunguma nga naglunsar sang kampuhan sa Sityo Veinte-Veinte Cuatro, Barangay Casile, Cabuyao, Laguna sadtong Pebrero 7. Ginapamatukan sang mga mangunguma ang pagpang-agaw sang ila duta sang Laguna Estates Development Corporation, ginapanag-iyahan sang pamilya Yulo. Ginkasuhan sila sang “trespassing” apang gilayon man nga ginbasura sang piskalya. Ginaangkon sang kumpaniya ang 24-ektarya nga duta sa barangay.

Sa Bulacan, gin-aresto sang mga elemento sang PNP-San Jose Del Monte (SJDM) si Engineer Even Calajate sadtong Pebrero 11, isa sa testigo batuk sa kumpaniyang Primewater. Ginaakusaran siya sang perjury (pagbinutig sa isa ka ginsumpaan nga panaysayon) sang lima ka suporter ni Rida Robes, meyor sang SJDM. Ang kaso kaangot sa iya nangin testimonya sa Senado sadtong Nobyembre 2025 sang maglunsar ini sang pangpubliko nga imbestigasyon tuhoy sa palpak nga serbisyo sang Primewater.

Pagpang-ipit. Duha ka lalaki nga nakasibilyan nga nagpakilala nga mga soldado ang nagkadto sa balay ni Eduardo Capuyan, retirado nga organisador sang mga mamumugon sa Southern Mindanao Region sadtong Pebrero 10. Gin-interogar siya kaangot sa pila ka mga indibidwal nga ginapangita sang militar.

Sa Caloocan City, pilit nga ginsulod kag ginkawatan ang opisina sang Gabriela-Caloocan sadtong Pebrero 17. Gindala sang mga ini ang projector, mga polyeto nga gamiton sa anibersaryo sang EDSA sa Pebrero 25, kag iban pa. Gin-ransak sang mga may kahimuan ang opisina. Una nga ginsulod kag ginpaidalum sa surbeylans ang opisina sang grupo sang mga nagpakilala nga pulis sadtong Oktobre 28, 2025.

Red-tagging. Sa Albay, halin Pebrero 8 natalupangdan ang paglapta sang mga poster sang NTF-Elcac kon diin gina-Red-tag ang mga progresibong lider kag grupong Bicolano sa palibot kag sulod sang mga unibersidad kag eskwelahan.Lakip sa biktima si Julius Espadero, bise presidente sang ACT Bicol Union.