Sang nagligad nga mga semana, naglunsar sang mga asembliya kag protesta kontra korapsyon ang mga progresibong grupo bilang paghanda sa dako nga protesta sa Pebrero 25, ika-40 nga anibersaryo sang pag-alsang EDSA. Panawagan sa mga aktibidad nga ini ang pagpasabat sa tanan nga imbolbado halin sa pinaka-putok-putokan.

Sadtong Pebrero 14, ginpangunahan sang Kilusang Bayan Kontra Kurakot (KBKK) ang asembliya sang masobra 50 ka organisasyon sa University of the Philippines-Diliman sa Quezon City. Nagpadala sang mensahe sang pagpakig-isa sa asembliya si Bishop Gerardo Alminaza, pinuno sang Caritas Philippines kag tsirman sang Catholic Bishops’ Conference of the Philippines Episcopal Commission on Social Action. Sa adlaw man nga ini, isa ka separado nga pagtililipon ang ginlunsar sang STOP Corruption Alliance sa Davao City.

Duha ka Black Friday Protest, sadtong Pebrero 13 kag 20, ang ginpatigayon sang mga alyado nga organisasyon sang KBKK. May mga hublag sa apat ka syudad sa National Capital Region, Baguio City, Bulacan, Laguna, Cavite, Batangas, Cebu, Iloilo, kag sa Tacloban City.

Sadtong Pebrero 20,gindumilian sang mga lokal nga opisyal sang Quezon City ang mga progresibong grupo nga maglunsar sang rali sa EDSA kag manawagan nga papanaugon si Marcos sa poder.