Ilablaban dagiti nailyan a minorya ti karbengan da iti tawid a daga laban iti panagkamkam ken panagserrek dagiti proyekto a dam, renewable energy, plantasyon ken real estate. Kadagiti napalabas a lawas, nagisayangkat da kadagiti tignay tapno salakniban ti karbengan da.

Idiay Quezon City, nagprotesta iti sango ti Department of Environment and Natural Resources Central Office dagiti grupo ti nailyan a minorya ken salaknib ti kalikasan kas pananglagip iti International Day of Action for Rivers (sangalubongan nga aldaw ti tignay para kadagiti karayan). Kinundenar da ti panagitakder ti dadakkel a dam ken proyekto a renewable energy a mangdaddadael iti kalikasan ken mangpadpadisi kadagiti mannalon ken katutubo.

Idiay Aklan, nagmartsa dagiti katutubo nga Ati, iti panangiyuna ti Boracay Ati Tribal Organization, idi Marso 16 iti kalsada ti Kalibo tapno batikusen ti panagkamkam iti tawid da a daga iti Boracay Island. Binatikos da ti Department of Agrarian Reform Provincial Office ken ti rehimen Marcos iti panangkanselar kadagiti Certificate of Land Ownership Award (CLOA) da idi 2024 iti kiddaw ti pribado a debeloper. Adda iti lima a lote idiay Boracay ti sanikwa ti katutubo ken “inted” ti gubyerno idi 2018 iti bileg ti CLOA.

Idiay Occidental Mindoro, kinundenar dagiti Mangyan-Iraya ken ti organisasyon da a Mangyan Iraya Repumpungan sa Malatabako ti panagpatalaw ti korte iti komunidad iti Sityo Malatabako, Barangay San Vicente idiay Abra de Ilog idi Marso 15. Inanamungan ti korte ti motion for execution nga indatag ti kumpanya ti real estate a Pieceland Corporation tapno mapapardas ti panagpapanaw kadagiti residente. Kasabwat ti kumpanya ti militar ken ti National Commission on Indigenous Peoples.

Idiay Negros Occidental, nagprotesta dagiti mannalon ken katutubo manipud idiay Candoni iti ruar ti gymnasium ti Barangay West kagiddan ti asembliya para iti Free, Prior and Informed Consent idi Marso 10-11. Dumar-ay da koma iti asembliya ngem pinawilan isuda dagiti tauhan ti Hacienda Asia Plantations Inc ken dagiti soldado ti 15th IB. Ti permit ket para iti operasyon ti 6,652.32 ektarya a plantasyon ti oil palm kadagiti barangay ti Gatuslao, Payawan ken Agboy idiay Candoni.