Gipakigbisog sa mga nasudnong minorya ang ilang katungod sa yutang kabilin batok sa pagpangawkaw ug pagsulod sa mga proyektong dam, renewable energy, plantasyon ug real estate. Sa milabay nga mga semana, naglunsad sila og mga protesta aron panalipdan ang ilang mga katungod.

Sa Quezon City, nagprotesta atubangan sa Central Office sa Department of Environment and Natural Resources ang mga grupo sa nasudnong minorya ug mga tigpanalipod sa kinaiyahan isip pagsaulog sa International Day of Action for Rivers (Internasyunal nga Adlaw para Panalipdan ang mga Suba). Gikondena nila ang pagtukod sa dagkong dam ug mga proyektong renewable energy nga naggun-ob sa kinaiyahan ug nagpalayas sa mga mag-uuma ug lumad.

Sa Aklan, nagmartsa ang mga lumad nga Ati, sa pangulo sa Boracay Ati Tribal Organization, niadtong Marso 16 sa dalan sa Kalibo aron batukan ang pagpangawkaw sa ilang yutang kabilin sa Boracay Island. Gimakmak nila ang Provincial Office sa Department of Agrarian Reform ug ang rehimeng Marcos sa pagkansela sa ilang mga Certificate of Land Ownership Award (CLOA) niadtong 2024 sa hangyo sa pribadong debeloper. Naa sa lima ka lote sa Boracay ang gipanag-iya sa mga lumad ug “gihatag” kanila sa gobyerno niadtong 2018 pinaagi sa CLOA.

Sa Occidental Mindoro, gikondena sa mga Mangyan-Iraya ug ilang organisasyon nga Mangyan Iraya Repumpungan sa Malatabako ang pag-abog kanila sa usa ka korte gikan sa ilang komunidad sa Sityo Malatabako, Barangay San Vicente sa Abra de Ilog niadtong Marso 15. Gisuportahan sa korte ang motion for execution nga gisang-at sa kumpanyang real estate nga Pieceland Corporation aron dalion ang pagpalayas sa mga residente. Kakunsabo sa kumpanya ang militar ug ang National Commission on Indigenous Peoples.

Sa Negros Occidental, nagprotesta ang mga mag-uuma ug lumad gikan sa Candoni niadtong Marso 10-11 gawas sa gymnasium sa Barangay West dungan sa asembliya alang sa Free, Prior and Informed Consent. Motambong unta sila sa asembliya apan gipugngan sila sa mga tawo sa Hacienda Asia Plantations Inc ug mga sundalo sa 15th IB. Ang permit alang sa operasyon sa 6,652.32 ektaryang plantasyon sa oil palm sa mga barangay sa Gatuslao, Payawan ug Agboy sa Candoni.