Gubat ti saan a maliklikan a pagtungpalan ti imperyalismo. Daytoy a panagamiris ni Vladimir Lenin ket nakalawlawag tatta a mapanpaneknekan nga usto kadagiti gera nga agresyon ti imperyalismo a US iti sidong ti mauyong a pasista a ni Donald Trump. Iti gagem nga ikutan dagitin pagtataudan ti langis ken mineral, nadangkok nga ar-aramaten tatta ti US ti sibubukel a pwersa militar kadagiti gera nga agresyon tapno rabngisen ti soberanya dagiti pagilyan nga agwaywayas, nga awan ti bigbigen na nga internasyunal a pagannurotan wenno linteg iti gera.

Kakumplot ti Zionista nga estado ti Israel, tallo lawasen a bombombaen ti US ti Iran, a nangkettel iti biag ti nasuroken 1,000 nga Iranian. Kagiddan daytoy, nasurok 1,000 ti pinatayen ti Zionista nga Israel iti panagbomba ken panagraut iti kaabay a pagilyan a Lebanon laban iti grupo a Hezbollah. Iti unos laeng ti dua a bulan, rinaut ti US ti Venezuela, inipit na ti pagilyan a Cuba ken pinangtaan ti Colombia, Mexico, Greenland ken dadduma pay a pagilyan.

Uray dehado, ipingpinget ti Iran a salakniban ti panagwaywayas na. Kaniwas iti pagayatan ni Trump a mangsugsog iti panagrukwas laban iti gubyerno nga anti-US, minilyon nga umili ti agturturong iti kalsada tapno babalawen ti panagraut ti US. Adda iti Iran ti amin a karbengan a salakniban ti bagbagi da laban iti gangannet nga agresyon. Naiduron daytoy nga irutan ti ayus ti langis iti Hormuz Strait ken patamaan dagiti kaasideg a pagilyan nga addaan base militar ti US tapno lapdan ti brutal nga agresyon ti imperyalismo a US.

Resulta ti panaggubat ti US idiay Middle East, dagiti pagilyan iti nadumaduma a paset ti lubong ket adda tatta iti ngarab ti istagplasyon—nga awan makaartap a panagtayok ti presyo dagiti gagatangen, iti tengnga ti istagnasyon wenno resesyon gubway ti panagbagsak ti produksyon, ken nasaknap nga disempleyo. Sumangsango tatta ti Pilipinas iti pangta ti nakaro a krisis iti ekonomya ken nauneg a panagsuwek ti pagbiagan. Agpegpeggad nga maipit ti suplay ti langis iti pagilyan. Ti panagngato ti presyo ti langis ket doble a saplit iti umili gapu iti nalabes a tuon iti presyo dagiti bukatot iti ganansya a kumpanya.

Gapu iti dimmakkel a gatad ti produksyon ken transportasyon, napaspas a timmayok ken tumayok pay ti presyo ti gistay amin a gagatangen, kabilang ti bagas (a dimmanunen iti ₱60 kada kilo), karne, ikan, nateng ken singir kadagiti serbisyo. Timmuon pay ti tuluy-tuloy a panagbagsak ti gatad ti piso kontra dolyar nga ad-adda pay a mangipangato ti gatad dagiti imported a tagilako (kabilang ti langis). Winayaan ni Marcos ti panagngato ti plete iti eroplano ken byahe iti barko, ngem agintutuleng met daytoy iti dawdawaten a panagngato ti plete dagiti drayber ken opereytor ti dyip, ken babassit a transportasyon, nga adu ket sumardengen iti panagpasada gapu iti pannakalugi.

Ad-adda a maisubsob ti tukad ti panagbiag ti umili a Pilipino nga agsagsagaba iti nababa a sweldo, palalo a kurang a sapul wenno kinaawan ti pagsapulan. Napigsa a basnut kadagiti mangmangged ti panagkedked nga ited ti makabiag a sweldo. Agngangabit nga agsardeng ti operasyon dagiti pabrika ken panagkaro ti disempleyo. Ti masa nga anakling-et ket kas nuang nga awan pannakabannog na nga agsapul ti pangsilpo ti biag dagiti pamilya da.

Ti burukrata-kapitalista ken parigat a rehimen Marcos ket tuleng iti arungaing ti umili. Ni Marcos ket kakunsabos dagiti buklis a kumpanya iti langis iti panangingato ti presyo, a kabatog na ket nayon a kolkolektaen na a buwis. Awan mamaay na ti nakabasbassit a subsidyo ken ayuda ken limitado a “libreng sakay.” Nayon a parigat ti “4-day workweek,” nangruna kadagiti agsusweldo ti inaldawan. Palalo nga inutil ti gubyerno a Marcos iti panangtaming iti pagimbagan ti minilyon a migrante a Pilipino idiay Middle East. “Aginut” ti awag iti umili a saanen a makaanges iti kinairut ti sinturon, bayat a ni Marcos ket agpapaimas ti biag iti nagdagusanna a P1-milyon kada rabii a hotel idiay New York. Binilyon a piso a pondo ti umili ti gasgastaren ti Armed Forces of the Philippines (AFP) ken militar ti US iti maiyar-aramid a Balikatan exercises nga agpaut iti mano a bulan. Nakadagdagsen a parigat iti umili ti korapsyon ken panagsamsam ni Marcos iti kaban ti umili. Kumarkaro ti binnusor dagiti agar-ari a paksyon a Marcos ken Duterte nga agpada met a korap ken paspasurot iti interes dagiti imperyalista a gangannaet. Awan sarday ti pasista a represyon iti sango ti pumigpigsa a panaglaban ti umili.

Iti sango ti gera ken krisis, kasapulan nga agkaykaysa ti umili a Pilipino ken sangsangkamaysa nga ilaban ti pagimbagan da. Papigsaen ti sangalubongan a panagkikinnabsat iti panagpukkaw a gibusanen ti gera nga agresyon ti US iti Iran ken panagsuporta iti umili iti Iran tapno salakniban ti nailyan a panagwaywayas da. Supyaten ti panagaramat iti Pilipinas a pagrubwatan dagiti gera nga agresyon ti US, papanawen dagiti base ken pasilidad militar iti sidong ti EDCA ken ibasura dagiti bangbangir a katulagan a mangigalgalut iti Pilipinas iti interes ti US ken mangguyguyod ditoy kadagiti imperyalista a gera. Nasken a kagiddan nga ilaban ti madagdagus a panagrolbak ti presyo ti langis, panangibasura iti Oil Deregulation Law, madagdagus a panangingato iti sweldo dagiti mangmangged ken sweldo dagiti empleyado ken panangikkat iti VAT ken dadduma pay a buwis tapno dagus a maibaba ti presyo dagiti gagatangen. Nainkalintegan ken rumbeng nga ilaban ti dawdawaten dagiti drayber ken opereytor ti dyip a nayon a plete.

Iyabante ti dangadang para iti pudno a nailyan a wayawaya, tapno makaruk-at iti armado a kontrol ken dominasyon ti imperyalismo a US iti ekonomya ken pulitika ti pagilyan. Us-usaren ti imperyalismo a US ti aso-aso a rehimen Marcos ken mersenaryo nga AFP tapno pagtalinaeden ti malakolonyal a panagari daytoy iti Pilipinas. Armado a pwersa ti kasapulan ti umili a Pilipino tapno ibagsak ti aso-aso nga estado tapno ruk-atan ti pagilyan iti armado a saklot ti imperyalista nga agila.

Daytoy ti istorikal a rebbengen ti New People’s Army iti panangidaulo ti Partido, kadwa da ti intero nga umili. Iti tengnga ti imperyalista a gera, nakaun-uneg ti kinapateg ti panagrambak iti umadani a maika-57 anibersaryo ti NPA tapno balbaliw a patibkeren ti pangngeddeng nga iyabante ti demokratiko a rebolusyon ti umili babaen ti naunday a gubat ti umili, a mangit-ited ti namnama a magibusan ti panagari ti imperyalismo a US iti pagilyan ken gun-oden ti nalawag a masakbayan. Uray tatta a bassit ken nakapsut pay ti NPA, determinado daytoy nga agpalawa ken agpapigsa iti kaaw-awayan, a nalawag a nakatannawag iti panagsingising ti Nalabbaga nga init iti masangwanan a daya.