Demolisyon idiay Marikina, malablabanan. Balbaliw nga intakder dagiti residente ti Agora Compound iti Barangay Sto. Niño, Marikina City ti kampuhan da idi Marso 14 tapno lapdan ti demolisyon iti komunidad da. Balbaliw nga immawag da para iti in-city relocation. Saan a bumaba iti 145 pamilya ti mapatalaw iti demolisyon.

Laban iti pribatisasyon ti palengke idiay Cebu, lumawlawa. Agsasaruno a protesta ti inyaramid dagiti grupo, aglaklako ken residente iti Carbon Market, Barangay Ermita idiay Cebu City idi Marso 14-17 tapno ibasura ti pribatisasyon ti palengke. Mapatta-patta a 16,000 nga aglaklako ken trabahador ti maawanan ti pwesto ken trabaho iti palengke, ken mairaman iti pribatisasyon ti 700 a balay iti kaabay a Sityo Bato.

Rekrutment ti AFP iti Ateneo, napawilan. Napaatras dagiti estudyante ti Ateneo de Manila University ti partisipasyon ti Armed Forces of the Philippines (AFP) iti Ateneo Career Fair idi Marso 13 gapu iti pannakabatikos ken rekord daytoy iti panaglabsing iti karbengan-tao. Iti aldaw ti career fair, nagrali dagiti estudyante ken inikkat da ti karatula nga “AFP Recruitment Booth.”

Madagdagus a panagpaawid kadagiti migrante, naiyawag. Nagprotesta dagiti grupo ti Migrante idiay Manila idi Marso 17 tapno iyawag ti natalged a panagpaawid kadagiti Migrante a Pilipinoi a naiipit iti gera idiay Middle East. Kagiddan daytoy ti pananglagip iti maika-31 anibersaryo ti pannakabitay ni Flor Contemplacion idi 1995.

.