Inpatungpal ti New People’s Army (NPA)-South Central Negros (Romeo Nanta Command) ti sangsyon ti demokratiko a gubyerno ti umili iti W.D Anglo Agri Farm, maysa a managabuso a kumpanya iti agrikultura idiay Negros Occidental idi Marso 8. Tagikwa daytoy ni Wilfred D. Anglo ken masarakan idiay Hacienda Baling, Barangay Libacao, Himamaylan City. Pinaralisa ken pinuoran ti NPA ti tallo a traktora, maysa a crane ken maysa a backhoe ti kumpanya a mapatta-patta nga agbalor ti ₱30-₱40 milyon.

Dagiti trabahante ti kumpanya ket nakaipasidong iti sistema a pakyaw. Dumandanon laeng iti ₱2,400 kada ektarya ti bayad para iti hilamon (panagparut), ₱930 tunggal 10,000 a pinuon ti unas ti patdan wenno panagmula, ₱220 kada tonelada iti panagkarga ken ₱3 iti panagkamada. Adayo nga ababa daytoy iti minimum nga inaldaw a sweldo dagiti mangmangged iti agrikultura idiay Negros Occidental (₱520) ken Negros Oriental (₱500). Daytoy ket alimpatok ti pyudal a kinadangkes nga ad-adda a mangitaptawak kadagiti mangmangged-talon iti biag ti sistematiko a panagbisin.

Ikalkali met ni Anglo iti agtutuon nga utang dagiti mangmangged-talon iti panangiyatnag ti 10% a linawas nga interes iti kwarta nga ut-utangen da.