Iginpapakigbisog han mga nasyunal nga minoriya an ira katungod ha ansestral nga tuna kontra ha panlulupot ngan pagsulod han mga proyekto nga dam, renewable energy, plantasyon ngan real estate. Ha nakataliwan nga mga semana, naglansar hira han mga paggios para depensahan an ira mga katungod.

Ha Quezon City, nagprotesta ha atubangan han Department of Environment and Natural Resources Central Office an mga grupo han nasyunal nga minoriya ngan tagdepensa han kalibungan komo paghandum ha International Day of Action for Rivers (pankalibutan nga adlaw han paggios para ha mga salog). Ginkundenar nira an pagtitindog han dagko nga dam ngan proyekto nga renewable energy nga naghihibang ha kalibungan ngan nagpapalayas ha mga parag-uma ngan minoriya.

Ha Aklan, nagmartsa an mga minoriya nga Ati, ha pangunguna han Boracay Ati Tribal Organization, hadton Marso 16 ha kakalsadahan han Kalibo agud suknaon an panlulupot ha ira ansestral nga tuna ha Boracay Island. Ginsukna nira an Department of Agrarian Reform Provincial Office ngan rehimen Marcos ha pagkansela ha ira mga Certificate of Land Ownership Award (CLOA) hadton 2024 ha hangyo han pribado nga debeloper. Aada ha lima nga lote ha Boracay an pananag-iya han minoriya ngan “iginhatag” han gubyerno hadton 2018 pinaagi han CLOA.

Ha Occidental Mindoro, ginkundenar han mga Mangyan-Iraya ngan ira organisasyon nga Mangyan Iraya Repumpungan sa Malatabako an pagpapalayas han usa nga korte hadton Marso 15 ha ira komunidad ha Sityo Malatabako, Barangay San Vicente ha Abra de Ilog. Gin-aprubaran han korte an motion for execution nga iginsalawad han kompaniya nga real estate nga Pieceland Corporation para mapadagmit an pagpapalayas ha mga residente. Kakunsabo han kompaniya an militar ngan an National Commission on Indigenous Peoples.

Ha Negros Occidental, nagprotesta an mga parag-uma ngan katutubo tikang ha Candoni hadton Marso 10-11 ha gawas han gymnasium han Barangay West kadungan han asembleya para ha Free, Prior and Informed Consent. Mapartisipar unta hira ha asembleya kundi ginpugngan han mga tawuhan han Hacienda Asia Plantations Inc ngan mga sundalo han 15th IB. An permit para ha operasyon han 6,652.32 kaektarya nga plantasyon han oil palm ha mga barangay han Gatuslao, Payawan ngan Agboy ha Candoni.