Ginpakig-away sang mga pungsodnon nga minorya ang ila kinamatarung sa duta sang mga katigulangan batuk sa pagpang-agaw kag pagsulod sang mga proyektong dam, renewable energy, plantasyon kag real estate. Sang nagligad nga mga semana, naglunsar sila sang mga hublag agud pangapinan ang ila mga kinamatarung.

Sa Quezon City, nagprotesta sa atubang sang DENR Central Office ang mga grupo sang pungsodnon nga minorya kag tagpangapin sang kapalibutan bilang pagdumdom sa International Day of Action for Rivers (pangkalibutanon nga adlaw sang hublag para sa mga suba). Ginkundenar nila ang pagtukod sang mga dalagko nga dam kag proyektong renewable energy nga nagaguba sa kapalibutan kag nagapalayas sa mga mangunguma kag tumandok.

Sa Aklan, nagmartsa ang mga tumandok nga Ati, sa pagpanguna sang Boracay Ati Tribal Organization, sadtong Marso 16 sa kadalanan sang Kalibo agud batikuson ang pagpang-agaw sa ila duta sang katigulangan sa Boracay Island. Ginbatikos nila ang DAR Provincial Office kag rehimen Marcos sa pagkanselar sang ila mga Certificate of Land Ownership Award (CLOA) sadtong 2024 sa hangyo sang pribado nga debelopar. Mga lima ka lote sa Boracay ang ginapanag-iyahan sang tumandok kag “ginhatag” sang gobyerno sadtong 2018 tungod sa CLOA.

Sa Occidental Mindoro, ginkundenar sang mga Mangyan-Iraya kag ila organisasyon nga Mangyan Iraya Repumpungan sa Malatabako ang pagpalayas sang isa ka korte sadtong Marso 15 sa ila komunidad sa Malatabako, Barangay San Vicente sa Abra de Ilog. Gin-apinan sang korte ang motion for execution nga ginpasaka sang kumpaniya nga real estate nga Pieceland Corporation para mapadasig ang pagpalayas sa mga residente. Kakunsabo sang kumpaniya ang militar kag ang NCIP.

Sa Negros Occidental, nagprotesta ang mga mangunguma kag tumandok halin sa Candoni sadtong Marso 10-11 sa guwa sang gymnasium sang Barangay West kadungan sang asembliya para sa FPIC. Magatambong kuntani sila sa asembliya apang ginpunggan sang mga tinawo sang Hacienda Asia Plantations Inc kag mga soldado sang 15th IB. Ang permit para sa operasyon sang 6,652.32 ektarya nga plantasyon sang oil palm sa mga barangay sang Gatuslao, Payawan kag Agboy sa Candoni.