Agsasaruno a protesta ken taripnong ti insayangkat dagiti mangmangged ken dagiti unyon da idiay Quezon City, Cavite ken Laguna tapno irupir a bigbigen ti karbengan da iti collective bargaining agreement (CBA) ken dadduma pay a karbengan iti tegged.

Idiay Quezon City, nagisumite ti Glowhrain-KMU-Kowloon House West Chapter Union ti Notice of Strike idi Marso 6 iti Deparment of Labor and Employment (DOLE) tapno ilaban ti CBA ken batikusen dagiti kaso ti panaglipit iti unyon da. Nagprotesta da met iti Kowloon House West idiay West Avenue, Quezon City iti didiay nga aldaw.

Kunada, saan a maaklon ti diaya ti maneydsment ti restawran a Katipunan Food Services Inc. (KFSI) a ₱10/aldaw a nayon a sweldo. Umuna a nagkiddaw ti unyon ti nayon a ₱50/aldaw ngem nagkompromison daytoy ken inbaba na iti ₱35/aldaw. Irekreklamo met dagiti mangmangged ti saan a panagsurot ti kumpanya kadagiti napagnunumwan a nayon a sweldo kadagiti napalabas a CBA a mapatta-patta a dumanonen iti ₱5.5 milyon iti tallo a tawen.

Kas sungbat ditoy, nag-anunsyo ti KFSI idi Marso 14 a saan nan a bagi ti restawran. Inikkat da metten ti karatula a “Kowloon House” a nakakabit iti ngato ti restawran ken sinukatan da ti nagan ti sabali a negosyo. Agdandanag ti unyon nga inlako wenno inyakar dan ti panagtagikwa iti restawran.

Idiay Laguna, agsasaruno a protesta ti insayangkat dagiti mangmangged ti PhilFoods Fresh Baked Products Inc, Gardenia Philippines ken Daiwa Seiko Philippines idi Marso 7, 9 ken 12. Nagmartsa da iti uneg ti engklabo a Laguna International Industrial Park idiay Barangay Mamplasan, Biñan. Kinundenar da ti inpila ti kapitalista a PhilFoods a kaso nga “insubordination” kadagiti unyonista idi Marso 4. Ti kaso ket kanaig ti protesta ti unyon a tungpalen ti kumpanya dagiti prubisyon ti CBA kanaig ti pasweldo.

Kabayatanna, naisubli iti trabaho idi Marso 9 ti dua a lider-unyonista ti Nexperia Philippines Inc. Workers Union (NPIWU-NAFLU-KMU) a nasisante idi 2024. Ti dua ket kabilang iti uppat a lider ti unyon nga aggigiddan a nasisante idi Disyembre 17, 2024 kas bales iti unyon. Daytoy ti nangiduron kadakwada nga agwelga idi Marso 2025.

Idiay Cavite, agkamkampanya ti Samahan ng mga Manggagawa sa EMI-Independent kadagiti mangmangged nga agpirma para iti Petition for Certification Election. Ti nasao a petisyon iti DOLE ket agkidkiddaw ti eleksyon tapno agpili ti unyon a mangibagi kadagiti mangmangged para iti negosasyon iti CBA.

Madama nga adda iti “freedom period” dagiti mangmangged ken kumpanya nu sadinno nga adda 60 aldaw a naituding tapno kariten wenno sukatan ti mangibagi nga unyon kadakwada iti negosasyon para iti CBA. Idi Pebrero 19, ti unyon ket nakapadas ti panaglipit kanaig ti panagurnong ti pirma para iti petisyon.