Agtudtudo ken rabiin ngem pursigido a nagturong ti grupo ti babbai a katutubo iti nagublagan ti maysa a yunit ti New People’s Army iti Barangay Berta iti maysa a larangan idiay Southern Tagalog. Nabara nga inawat da ti imbitasyon para iti panangbukel ti Makabayang Kilusan ng Bagong Kababaihan (Makibaka), ti rebolusyonaryo nga organisasyon ti babbai para iti armado a dangadang. Ti taripnong ket pananglagip iti Sangalubongan nga Aldaw ti Babbai nga Anakling-et.

Umuna a tinalantan da iti pulong ti seguridad, sumaruno ti ababa a panangilawag iti panggep ti panagbukel ti rebolusyonaryo a timpuyog ken panagiinnammo dagiti dimmar-ay ken dagiti kakadwa a hukbo. Naipalawag kadagiti dimmar-ay ti kinapateg ti panagkaykaysa ken dagiti disbentahe ti panagsisina. Amin ket umanamong iti panangbukel ti grupo ken dagus da a nangituding kadagiti lider da. Nailawag kadagiti lider ken kameng dagiti rebbengen ken responsibilidad da.

“Allukoyen mi dagiti babbai a saan a nakadar-ay tatta a pumauneg iti grupo mi,” panangisigurado ni Ka Edna, maysa kadagiti napili a lider. Gapu ta nasipngeten ket iti sumaruno nga aldaw laengen nga inyeskedyul da ti pormal nga innadal.

Didiay met laeng nga aldaw, immunan a binukel da ti grupo dagiti katutubo. Inyaramid da daytoy kalpasan ti panagadal ti Ababa a Kurso iti Gimong ken Rebolusyon a Pilipino. Ti panagadal ket inyannatup dagiti instruktor iti tukad ti literasiya ken numerasiya dagiti nagadal ken inaramid da a makapaengganyo babaen ti panangidrowing ti mapa ken panangited kadagiti maikanatad nga ehemplo. Adda met sumagmamano a bidyo a naipabuya sakbay ken kalpasan ti innadal.

Naregta ti tinnalantan ken aktibo a nangibinglay dagiti estudyante kadagiti kapadasan ken kaamwan da. “Kakaasi talaga dagiti katutubo nu sumrek ti gangannaet a minas ditoy, sigurado a mapatalaw kami ken mapukaw ti pagbiagan mi,” inlanad ni Ka Elmer, maysa a lider ti grupo, nu kasano a nakaapektar kadakwada ti imperyalismo.

Ammo da ti pangta dagiti gangannaet a minas iti kalikasan. Maawatan da a gapu iti monopolyo ken konsentrasyon ti daga iti sumagmamano a nabileg a pamilya isu nga awan ti bukod da a daga a suksukayen. Makitaltalon da laeng iti bassit nga apo’t daga iti bingayan a 60-40. Kargo da ti amin a gastos iti kanyogan ngem gapu ta awan ti pangpinansiya da ket agut-utang da iti amo da. Palalo a kurang ti masapsapulan da isu a nailumlom da iti utang. Saan a matultulungan isuda ti korap a reaksyunaryo a gubyerno tapno makalung-aw iti kinakurapay.

“Kasapulan pay nga isaldak ti nuang ko iti komersyante tapno ibayad iti panagpaospital ti apok a naaksidente. Nakanginngina ti agas! Diay masapsapulak iti panagkopra a ginatang da iti nakalaklaka ket kurang pay a pangbayad ti utang,” naliday nga istorya ni Ka Sanny, ti kabaketan iti grupo. Mangngeg iti boses na ti pannakadismaya iti gubyerno a patpatarayen dagiti korap ken kunniber. Ammo na ti kinainutil daytoy iti panangisigurado iti karbengan da iti salun-at.

Bayat a bukbuklen da dagiti timpuyog, insakad ti masa ti seguridad ti baryo. Nagpatrulya ken dagus a nag-ulat da iti yunit kadagiti nadlaw da iti aglawlaw.

Mano a tawen met a saan a nasublian ti hukbo ti umili ti lugar. Nabayag nga inokupar daytoy dagiti soldado isu a nagbalin a naannad ti yunit iti panagasideg ken panangkilatis kadagiti datin a naorganisa ken matalek pay ti rebolusyonaryo a tignay.

“Iti panagserrek iti rekoberi erya, umuna a gundaway daytoy a nakabukel ti dua a grupo iti unos laeng ti maysa nga aldaw,” segun ken Ka Yanny, maysa a tim lider.

Nalpas dagiti taripnong a naragsak dagiti masa ken dagiti kabataan a makipagbibiag iti kaaw-awayan iti sibay dagiti Nalabbaga a mannakigubat. “Adu ti nasursurok iti panangbukel ti grupo, nu kasano nga umannatop kadagiti agdengdengngeg, manipud iti lenggwahe agingga iti panangited ti ehemplo kadagiti topiko a teoretikal a nalaklaka da a matarusan ken basar met laeng iti kapadasan da,” kuna ni Ka Mars, kameng ti Kabataang Makabayan.

Mano nga aldaw ko pay laeng ditoy Nalabbaga a hukbo, adun ti nasursurok ken nanayunan ti kapadasak,” panangibingay ni Ka Paolo. Kabilang da Ka Paolo ken Ka Mars kadagiti kabataan manipud iti syudad a simmungbat iti panawagan ti Communist Party of the Philippines nga agturong iti kaaw-awayan, makasursuro ken makaibinglay iti armado a dangadang.