Gin-aresto ha magkadungan nga mga operasyon han Philippine National Police ngan Armed Forces of the Philippines ha Tarlac City ngan Quezon City hadton Marso 11 an 10 nga indibidwal kaupod hi Gabriel Kennedy Bangibang, konsultant han National Democratic Front of the Philippines (NDFP) para ha Cordillera ngan karukayaknon han nasyunal nga minoriya. Gin-akusaran hira nga mga membro ngan upisyal han Komite han Rehiyon han Partido Komunista ng Pilipinas ngan Bagong Hukbong Bayan ha Ilocos-Cordillera.

Ha Tarlac City, gindakop hira Bangibang, Dr. Ana Marie Rilloroza, Theresa Forag, Ranee Francella Tuazon, Renato Ginez, Marc Mendiola ngan Javar Sugao ha usa nga balay ha Barangay Baras-baras. Naatubang an pito ha mga kaso nga pagpatay, gin-atentar nga pagpatay, qualified trafficking ngan illegal possession of firearms and explosives. Ha panahon han pag-aresto, ginpinambalbag hira ha ulo, ginpinanuntok an nawong ngan tiyan, ngan iginkunud-kunod ha salog.

Ha Quezon City, gin-aresto hira Jess Gamay Lang-ay, Bobby Calsiyao Yag-ao ngan usa pa nga indibidwal. Hi Yag-ao nakapriso kundi hira Gamay ngan usa pa niya nga kaupod nawawara kahuman “pagawason” han mga pulis ha kawaray han nakasalawad nga kaso ha ira. Diri hira mahiagian ngan makontak han pamilya nga grabe nira nga iginkakabaraka.

Ha iba nga parte han nasud, nahireport an mga kaso han panmusil, pangastigo ngan pagkakampo han militar ha mga sibilyan nga pasilidad.

Ha Negros Occidental, ginpauranan han bala han 15th IB an sibilyan nga drayber nga hi Gary Jorpo hadton Marso 6 han gab-i ha Barangay Tapi, Kabankalan City. Nasamaran hiya ha tiil. Hadton Marso 9 ngan 11, gintarhug ngan ginkastigo han 79th IB an usa nga lagas nga parag-uma ngan duha nga magbugto nga lalaki ha Barangay Paitan, Escalante City han mapagdiskitahan han mga sundalo. Ha pira nga parte han Central Negros, waray hunong an okupasyon han militar ha mga pansibilyan nga pasilidad ngan pagpapatawag ha mga sibilyan.

Ha Masbate, ginsulod han 2nd IB an duha nga eskoylahan ha Barangay Libertad, Cawayan hadton Marso 10. Gin-usa-usa han mga sundalo an mga estudyante ngan ginbiling an mga anak han gin-aakusaran nga mga rebelde. Nagkakampo liwat an militar ha mga sibilyan nga pasilidad ha mga barangay ha bungto han Palanas, Cataingan ngan Cawayan tikang pa Enero.

Ha Northern Samar, nag-imponer han hamlet an AFP ha mga barangay han Poponton, Paco, Caputo-an, Lakandula, Victory, ngan Cuenco ha Las Navas. Kada nagawas ha baryo, gin-oobliga an mga residente nga pumirma ha logbook ngan kumuha hin numero komo “pagpamatuod” han pagigin sibilyan. Gin-iistriktuhan liwat an pagbabantay ha mga lokal nga produkto. Ha Catubig, gintarhug han 19th IB an usa nga 15-anyos nga ulitawo ha Barangay Opong.