Giaresto sa dungan nga mga operasyon sa Philippine National Police ug Armed Forces of the Philippines sa Tarlac City ug Quezon City niadtong Marso 11 ang 10 ka indibidwal lakip si Gabriel Kennedy Bangibang, konsultant sa National Democratic Front of the Philippines (NDFP) para sa Cordillera ug hisgutanan sa nasudnong minorya. Gipasanginlan sila nga mga myembro ug opisyal sa Komiteng Rehiyon sa Partido Komunista ng Pilipinas ug Bagong Hukbong Bayan sa Ilocos-Cordillera.

Sa Tarlac City, gidakop sina Bangibang, Dr. Ana Marie Rilloroza, Theresa Forag, Ranee Francella Tuazon, Renato Ginez, Marc Mendiola ug Javar Sugao sa usa ka balay sa Barangay Baras-baras. Nag-atubang sila og pito ka kaso sa pagpatay, tangkang pagpatay, qualified trafficking ug illegal possession of firearms and explosives. Sa panahon sa pag-aresto, gihapak sila sa ulo, gisumbag suntok sa nawong ug tiyan, ug gibag-id ang nawong sa salog.

Sa Quezon City, gidakop sila Jess Gamay Lang-ay, Bobby Calsiyao Yag-ao ug usa pa nga indibidwal. Si Yag-ao gipreso apan sila Gamay ug usa pa niyang kauban nawala human “gipalingkawas” sa mga pulis tungod kay walay nakasang-at nga kaso batok kanila. Wala sila nakit-an ug makontak sa pamilya nga dakong ikabalaka nila.

Sa ubang bahin sa nasud, nataho ang mga insidente sa pagpamusil, pagpangulata ug pagkampo sa militar sa mga sibilyang pasilidad.

Sa Negros Occidental, gipaulanan og bala sa 15th IB ang sibilyang drayber nga si Gary Jorpo niadtong Marso 6 sa gabii sa Barangay Tapi, Kabankalan City. Naigo siya sa tiil. Niadtong Marso 9 ug 11, gihadlok ug gibugbug sa 79th IB ang usa ka tigulang nga mag-uuma ug duha ka manag-igsoon nga lalaki sa Barangay Paitan, Escalante City human giinitan sa mga sundalo. Sa pipila ka bahin sa Central Negros, walay hunong ang okupasyon sa militar sa mga sibilyang pasilidad ug pagpatawag sa mga sibilyan.

Sa Masbate, gisulod sa 2nd IB ang duha ka eskwelahan sa Barangay Libertad, Cawayan niadtong Marso 10. Giisa-isa sa mga sundalo ang mga estudyante ug gipangita ang mga anak sa mga giakusahang rebelde. Nagkampo usab ang militar sa mga sibilyang pasilidad sa mga barangay sa lungsod sa Palanas, Cataingan ug Cawayan gikan pa sa Enero.

Sa Northern Samar, nagpahamtang og hamlet ang AFP sa mga barangay sa Poponton, Paco, Caputo-an, Lakandula, Victory, ug Cuenco sa Las Navas. Sa matag paggawas sa baryo, gipugos ang mga residente nga mopirma sa logbook ug mokuha og numero isip “ebidensya” sa pagka-sibilyan. Gipahugtan usab ang pagbantay sa mga bililhon ug produkto. Sa Catubig, gihasi sa 19th IB ang usa ka 15-anyos nga ulitawo sa Barangay Opong.