Iginpatuman han Bagong Hukbong Bayan (BHB)-South Central Negros (Romeo Nanta Command) an sangsyon han demokratiko nga gubyerno han katawhan ha W.D Anglo Agri Farm, usa nga mapangabuso nga kompaniya ha agrikultura ha Negros Occidental hadton Marso 8. Pananag-iya ini ni Wilfred D. Anglo ngan matatad-an ha Hacienda Baling, Barangay Libacao, Himamaylan City. Ginparalisa ngan ginsunog han BHB an tulo nga traktora, usa nga crane ngan usa nga backhoe han kompaniya nga gintatantiya nga nabalor han ₱30-₱40 kamilyon.

An mga trabahador han kompaniya nakapailarum ha sistema nga pakyaw. Naabot la ha ₱2,400 kada ektarya an bayad para ha hilamon (weeding), ₱930 kada laksa (katugbang han 10,000 binunglan han tubo) an patdan o pagtatanum, ₱220 kada tonelada ha pagpanit, ngan ₱3 ha kamada (stacking). Hirayo nga himubo ini ha minimum nga inadlaw nga suhol ha Negros Occidental (₱520) ngan Negros Oriental (₱500) han mga trabahador ha agrikultura, nga pungkay han pyudal nga karat-an nga dugang nga nagluludlod ha mga trabahador ha uma ha kinabuhi han sistematiko nga kagutom.

Iginlulubong liwat ni Anglo ha luun-luon nga utang an mga trabahador ha uma ha pag-iimponer han 10% nga sinemana nga interes ha kwarta nga gin-uutang nira.