Gerra an diri malilikyan nga hingaradtuan han imperyalismo. Ini nga pag-analisar ni Vladimir Lenin klaro gud yana nga napapamatud-an nga tukma ha mga gerra nga agresyon han imperyalismo nga US ilarum han tuyaw nga pasista nga hi Donald Trump. Ha paghingyap nga angkunon an mga surok han lana ngan mineral, waray wantas nga gin-gagamit yana han US an bug-os nga panmilitar nga pwersa ha mga gerra nga agresyon agud tamakan an soberaniya han mga nasud nga naglulugaring, nga waray ginkakahadlukan nga internasyunal nga pagsurundon o balaud ha gerra.

Kakunsabo an Zionista nga estado han Israel, tulo kasemana na nga waray wantas nga ginbobomba han US an Iran, nga nagpatay ha pakabuhi han masobra 1,000 na nga Iranian. Kadungan hini, masobra 1,000 na an ginpatay han Zionista nga Israel ha panmomba ngan pag-atake ha kasapit nga nasud nga Lebanon kontra ha grupo nga Hezbollah. Ha sakob la han duha kabulan, gin-atake han US an Venezuela, gin-gipit an nasud Cuba, ngan gintarhug an Colombia, Mexico, Greenland ngan iba pa nga nasud.

Bisan kun dehado, pursigido an pagdepensa han Iran ha iya paglulugaring. Sukwahi ha karuyag ni Trump nga manulsol hin pag-aalsa kontra ha gubyerno nga kontra-US, milyun-milyon nga katawhan an narabunos ha kakalsadahan agud suknaon an pangatake han US. Aada ha Iran an bug-os nga katungod nga magdepensa kontra ha langyaw nga agresyon. An paghuhugot hini ha aragian han lana ha Hormuz Strait ngan mga atake ha mga kasapit nga nasud nga mayda base militar han US mga gipit nga pitad para pugngan an brutal nga pangatake han imperyalismo nga US.

Resulta han pan-gegerra han US ha Middle East, an mga nasud ha magkalain-lain nga parte han kalibutan aada yana ha peligro han istagplasyon—han waray kapareho nga paghitaas han presyo han mga papliton, ha butnga han istagnasyon o resesyon dara han pagbagsak han produksyon, ngan hiluagan nga disempleyo. Naatubang yana an Pilipinas ha hulga han grabe nga krisis ha ekonomiya ngan hilarum nga pagbagsak han pakabuhi. Namemeligro nga magin limitado an suplay han lana ha nasud. Doble an hampak ha katawhan han paghitaas han presyo han lana tungod ha sobra nga dugang ha presyo han mga hakog-ha-ganansya nga kompaniya.

Tungod ha nagdako nga balor han produksyon ngan transportasyon, madagmit nga tigda nga naghitaas ngan mahitaas pa an presyo han haros ngatanan nga papliton, kalakip an bugas (nga inabot na ha ₱60 kada kilo), karne, isda ngan utanon, ngan sukot ha mga serbisyo. Dinugang pa an dirudiretso nga pagbagsak han balor han piso kontra dolyar nga mas magpapahitaas pa ha balor han mga imported nga epektos (kalakip an lana). Gintagan-lugway ni Marcos an paghitaas han pamasahe ha edro ngan biyahe ha barko, kundi nagpapakabungul-bungol naman ini ha gindedemanda nga umento ha pamasahe han mga drayber ngan opereytor han dyip ngan gudti nga transportasyon, nga damo an maundang na ha pamamasada tungod ha pagkalugi.

Mas mabagsak an lebel han panginabuhi han katawhan Pilipino nga nag-aantos ha himubo nga suhol, ura-ura kakulang nga kita o kawaray hin pakabuhi. Grabe nga hampak ha mga trabahador an pagdiri nga ighatag an gindedemanda nga makaburuhi nga suhol. Namamangpangan nga umundang an operasyon han mga pabrika ngan paggrabe han disempleyo. Baga-karabaw an masa nga anakbalhas para la mamiling han sustento han ira mga pamilya.

Bungol ha mga demanda han katawhan ngan pakuri an burukrata-kapitalista nga rehimen Marcos. Kakunsabo hi Marcos han mga hamad nga kompaniya ha lana ha paghitaas han presyo, nga an katugbang dugang nga ginkokolekta nga buhis. Waray pulos an talagudti nga subsidyo ngan ayuda ngan limitado nga “libre nga sakay.” Dugang nga pakuri an “4-day work week,” labina ha mga ginsusuhulan hin inadlaw. Ura-ura kainutil an gubyerno nga Marcos ha pagpanginano han kaupayan han milyun-milyon nga migrante nga Pilipino ha Middle East. “Magtipid” an panawagan ha katawhan nga diri na makaginhawa ha grabe nga pagtitipid, samtang nagpaparasa hi Marcos ha ginhigdaan nga ₱1-kamilyon kada gab-i nga hotel ha New York. Bilyun-bilyon kapiso nga pondo han katawhan an ginmamalgastar han Armed Forces of the Philippines (AFP) ngan militar han US ha ginhihimo nga Balikatan exercises nga mag-iiha hin pira kabulan. Ura-ura kabug-at nga pakuri ha katawhan an korapsyon ngan pandambong ni Marcos ha pondo han katawhan. Tikagrabe an aragway han mga naghahadi nga paksyon nga Marcos ngan Duterte nga ngaduha naman korap ngan naalagad ha interes han mga imperyalista nga langyaw. Waray hunong an pasista nga panmuypoy ha atubangan han natikakusog nga pag-ato han katawhan.

Atubangan han gerra ngan krisis, kinahanglan magkaurusa an katawhan Pilipino ngan duruyog nga ipakigbisog an ira interes. Pakusgon an pankalibutan nga pagkamagbinurugto ha pagguliat para tapuson an gerra nga agresyon han US ha Iran, ngan pagsuporta ha katawhan han Iran para depensahan an ira nasyunal nga paglulugaring. Tipahan an paggamit ha Pilipinas nga lansaran han mga gerra nga agresyon han US, palayason an mga base ngan pasilidad militar ilarum han EDCA, ngan ibasura an mga diri pantay nga kasarabutan nga naghihigot ha Pilipinas ha interes han US ngan nagdadanas dinhi ha mga imperyalista nga gerra. Kinahanglan kadungan nga ipakigbisog an layon nga pagrolbak ha presyo han lana, pagpapabasura ha Oil Deregulation Law, dagmit nga paghitaas ha suhol han mga trabahador ngan sweldo han mga empleyado, ngan pagtanggal han VAT ngan iba pa nga buhis agud layon nga mapaluros an presyo han mga papliton. Makatadungan an gin-aaro nga dugang nga pamasahe han mga drayber ngan opereytor han dyip ngan kinahanglan ipakigbisog.

Ipasulong an pakigbisog para ha tinuod nga nasyunal nga katalwasan, agud makaalinggawas ha armado nga kontrol ngan dominasyon han imperyalismo nga US ha ekonomiya ngan pulitika han nasud. Gamit han imperyalismo nga US an papet nga rehimen Marcos ngan mersenaryo nga AFP agud igpabilin an bagakolonyal nga paghahadi hini ha Pilipinas. Armado nga pwersa an kinahanglan han katawhan Pilipino agud ibagsak an papet nga estado ngan talwason an nasud ha armado nga pagdasmag han imperyalista nga agila.

Ini an makasaysayan nga buruhaton han Bagong Hukbong Bayan ha pamumuno han Partido, kaupod an bug-os nga katawhan. Ha butnga han imperyalista nga gerra, hilarum gud an kamahinungdanon han pagsalin-urog ha tiarabot nga ika-57 nga anibersaryo han BHB agud utro nga padig-unon an determinasyon nga ipasulong an demokratiko nga rebolusyon han katawhan pinaagi han panmaihaan nga gerra han katawhan, nga dara ha katawhan an paglaum nga tapuson an paghahadi han imperyalismo nga US ha nasud ngan kab-uton an malamrag nga kabubwason. Bisan yana nga guti ngan maluya pa an BHB, determinado ini nga magpahiluag ngan magpakusog ha kabaryuhan, nga klaro nga nakatan-aw ha pagsirak han Pula nga adlaw ha sinirangan nga tidaraon.