Susrunod nga protesta ngan katitirok an ginlansar han mga trabahador ngan ira unyon ha Quezon City, Cavite ngan Laguna agud ig-insister nga respetuhon an ira collective bargaining agreement (CBA) ngan iba pa nga katungod ha pagtrabaho.

Ha Quezon City, nagsubmiter an Glowhrain-KMU-Kowloon House West Chapter Union han Notice of Strike hadton Marso 6 ha Deparment of Labor and Employment (DOLE) agud ipakigbisog an CBA ngan suknaon an mga kaso han pan-gigipit ha ira unyon. Nagprotesta liwat hira ha Kowloon House West ha West Avenue, Quezon City hiton nga adlaw.

Sering nira, diri makarukarawat an tanyag nga ₱10/kaadlaw nga dugang nga suhol han pamunuan han restawran nga Katipunan Food Services Inc. (KFSI). Syahan nga nagdemanda an unyon hin dugang nga ₱50/adlaw kundi nagkompromiso na ini ngan ginluros ngadto ha ₱35/araw. Iginrereklamo liwat han mga trabahador an diri pagsunod han kompaniya ha mga ginkasarabutan nga dugang nga suhol ha mga nakalabay nga CBA nga gintatantiya nga inabot na ha ₱5.5 kamilyon ha tulo katuig.

Komo baton dinhi, nag-anunsyo an KFSI hadton Marso 14 nga diri na hini pananag-iya an restawran. Gintanggal na liwat an karatula nga “Kowloon House” nga nakasab-ong ha igbaw han restawran ngan ginliwanan han ngaran han iba nga negosyo. Nababaraka an unyon nga iginbaligya o iginbalhin na han pananag-iya an restawran.

Ha Laguna, susrunod nga protesta an ginlansar han mga trabahador han PhilFoods Fresh Baked Products Inc, Gardenia Philippines ngan Daiwa Seiko Philippines hadton Marso 7, 9 ngan 12. Nagmartsa hira ha sulod han engklabo nga Laguna International Industrial Park ha Barangay Mamplasan, Biñan. Ginkundenar nira an iginsalawad han kapitalista nga PhilFoods hadton Marso 4 nga kaso nga “insubordination” ha mga unyonista. Kasumpay an kaso ha protesta han unyon nga igpatuman han kompaniya an mga probisyon han CBA kasumpay han suhol.

Samtang, nahibalik ha trabaho hadton Marso 9 an duha nga lider-unyonista han Nexperia Philippines Inc. Workers Union (NPIWU-NAFLU-KMU) nga gintanggal hadton 2024. An duha kaupod ha upat nga mga lider han unyon nga dudrungan nga gintanggal hadton Disyembre 17, 2024 komo bulos ha unyon. Ini an nagduso ha ira nga magwelga hadton Marso 2025.

Ha Cavite, nagkakampanya an Samahan ng mga Manggagawa sa EMI-Independent ha mga trabahador nga nagpirma para ha Petition for Certification Election. An nasering nga petisyon ha DOLE nagdedemanda han eleksyon para pumili han unyon nga magtataglawas ha mga trabahador para ha negosasyon ha CBA.

Aada yana ha “freedom period” an mga trabahador ngan kompaniya diin mayda 60 kaadlaw nga nakaalutaga para ayaton o balyuan an ira representante nga unyon ha negosasyon para ha CBA. Hadton Pebrero 19, nahiagum han pan-gigipit an unyon kasumpay han pangangalap han pirma para ha petisyon.