Demolisyon ha Marikina, gin-aatuhan. Utro nga igintindog han mga residente han Agora Compound ha Barangay Sto. Niño, Marikina City an ira kampuhan hadton Marso 14 agud pugngan an demolisyon ha ira komunidad. Utro hira nga nanawagan para ha in-city relocation. Diri mamenos ha 145 kapamilya an palalayason han demolisyon.

Pag-ato ha pribatisasyon han merkado ha Cebu, natikahiluag. Susrunod nga protesta an iginlansar han mga grupo, parupaninda ngan residente ha Carbon Market, Barangay Ermita ha Cebu City hadton Marso 14-17 agud ipabasura an pribatisasyon han merkado. Gintatantiya nga 16,000 nga parupaninda ngan trabahador an mawawarayan han pwesto ngan trabaho ha merkado, ngan maaapektuhan an 700 nga balay ha kasapit nga Sityo Bato ha pribatisasyon.

Rekrutment han AFP ha Ateneo, napugngan. Napaatras han mga estudyante han Ateneo de Manila University an partisipasyon han Armed Forces of the Philippines (AFP) ha Ateneo Career Fair hadton Marso 13 tungod ha pagsukna dinhi ngan rekord hini han pagtalapas ha tawhanon nga katungod. Ha adlaw han career fair, nagrali an mga estudyante ngan ginbaklas an karatula ngan “AFP Recruitment Booth.”

Dagmit nga pagpapauli ha mga migrante, iginpapanawagan. Nagprotesta an mga grupo han Migrante ha Mendiola ha Manila hadton Marso 17 agud ipanawagan an talwas nga pagpapauli ha mga migrante nga Pilipino nga napipiit ha gerra ha Middle East. Kadungan hini an paghinumdum ha ika-31 nga anibersaryo han pagbitay kan Flor Contemplacion hadton 1995.