Gin-aresto sa dungan nga mga operasyon sang Philippine National Police kag Armed Forces of the Philippines sa Tarlac City kag Quezon City sadtong Marso 11 ang 10 ka indibidwal lakip si Gabriel Kennedy Bangibang, konsultant sang National Democratic Front of the Philippines (NDFP) para sa Cordillera kag hambalanon sa pungsodnon nga minorya. Ginaakusaran sila nga mga myembro kag opisyal sang Komiteng Rehiyon sang Partido Komunista ng Pilipinas kag Bagong Hukbong Bayan sa Ilocos-Cordillera.

Sa Tarlac City, gindakop sanday Bangibang, Dr. Ana Marie Rilloroza, Theresa Forag, Ranee Francella Tuazon, Renato Ginez, Marc Mendiola kag Javar Sugao sa isa ka balay sa Barangay Baras-baras. Nagaatubang ang pito sa mga kaso nga pagpatay, pagtilaw nga pagpatay, qualified trafficking kag illegal possession of firearms and explosives. Sa panahon sang pag-aresto, ginpanglampusan sila sa ulo, ginpangsumbag ang nawong kag tiyan, kag ginbagnos ang nawong sa salog.

Sa Quezon City, gin-aresto sanday Jess Gamay Lang-ay, Bobby Calsiyao Yag-ao kag isa pa ka indibidwal. Si Yag-ao nabilanggo apang sanday Gamay kag isa pa niya ka upod indi makita pagkatapos nga “hilwayon” sang mga pulis sa kawad-on sang kaso nga napasaka sa ila. Indi sila makita kag makontak sang pamilya nga grabe nga nagakabalaka sa ila.

Sa iban nga bahin sang pungsod, nareport ang mga kaso sang pagpangtiro, pagpangkastigo kag pagkampo sang militar sa mga sibilyan nga pasilidad.

Sa Negros Occidental, ginpaulanan sang bala sang 15th IB ang sibilyan nga drayber nga si Gary Jorpo sadtong Marso 6 sang gab-i sa Barangay Tapi, Kabankalan City. Sadtong Marso 9 kag 11, ginpahog kag ginkastigo sang 79th IB ang isa ka tigulang nga mangunguma kag duha ka mag-utod nga lalaki sa Barangay Paitan, Escalante City sang nadiskitahan sang mga soldado. Sa pila ka bahin sang Central Negros, wala-untat ang okupasyon sang militar sa mga sibilyan nga pasilidad kag pagpatawag sa mga sibilyan.

Sa Masbate, ginsulod sang 2nd IB ang duha ka eskwelahan sa Barangay Libertad, Cawayan sadtong Marso 10. Gin-isa-isa sang mga soldado ang mga estudyante kag ginpangita ang mga anak sang ginapasibangdan nga mga rebelde. Nagkampo man ang militar sa mga sibilyan nga pasilidad sa mga barangay sa banwa sang Palanas, Cataingan kag Cawayan halin pa Enero.

Sa Northern Samar, nagpatuman sang hamlet ang AFP sa mga barangay sang Poponton, Paco, Caputo-an, Lakandula, Victory, kag Cuenco sa Las Navas. Kada mag-guwa sa baryo, gina-obligar ang mga residente nga magpirma sa logbook kag magkuha sang numero bilang “pamatuod” sang pagka-sibilyan. Gin-ipit man ang pagbantay sa mga baligya kag produkto. Sa Catubig, ginpahog sang 19th IB ang 15 anyos nga soltero sa Barangay Opong.