Hamulag nga gin-anunsyo sadtong Nobyembre 28 sang Negotiating Panel sang National Democratic Front of the Philippines (NDFP) kag matag-as nga upisyal sa gabinete kag militar sang Gubyerno ng Republika ng Pilipinas (GRP) ang plano sang duha ka habig nga liwat buksan ang estoryahanay pangkalinong. Ginsapubliko nila ang gin-isa nga pahayag nga ginpirmahan sang NDFP Negotiating Panel kag sang GRP sadtong Nobyembre 23 sa Oslo, Norway.

Nag-atubang sa publiko kag nagbasa sang mga pahayag sila Kaupod Julie de Lima, kag mga myembro sang NDFP Negotiating Panel nga sila ni Kaupod Coni Ledesma, kag Nonoy Palima, kag si Ka Luis Jalandoni bilang punong tigpanugyan.

Ang Oslo Joint Statement ang deklarasyon sang tuyo ukon handum nga liwat buksan ang estoryahanay kag him-uson ang balayon kung paano ini ipatuman. Isa ini ka pangkabilugan nga deklarasyon kung sa diin gintingob ang mga handum sang duha ka habig: ang pagsolbar sa “madalom nga nakaugat nga sosyo-ekonomiko kag pulitikal nga mga hambalanon” kag “pagsolbar sa mga ugat sang armado nga banggianay,” sa habig sang NDFP; kag sa pihak nga habig, ang “pagtapos sang armado nga paghimakas” kag “transpormasyon sang CPP-NPA-NDFP,” nga katuyuan sang GRP.

“Ang Gin-isa nga Pahayag nga parehong ginpirmahan sang NDFP kag GRP ang mahinungdanon sa kaugalingon sini kag nagabukas sang alagyan para sa madamo nga potensyal kag palaabuton sa handum sang isa ka makatarunganon kag pangmalawigon nga kalinong sa aton kaugalingon nga pungsod kag para sa kaayuhan sang aton nga pumuluyo,” pahayag ni Ka Luis Jalandoni, myembro sang NDFP National Executive Council kag senior consultant sa estoryahanay pangkalinong, sa adlaw nga ginpirmahan ang gin-isa nga pahayag. Base sa iya, handa ang pareho nga Partido nga ipadayon ang negosasyon samtang “nagapanindugan sa mga kadalag-an kag gintudlo halin sa mga leksyon sa nagliligad.”

Produkto sang serye sang mga impormal nga talakayan nga gintigayon sa Netherlands kag Norway ang gin-isa nga pahayag. Ginsugdan ini sadto pang 2022 sa tunga sang mga emisaryo sang GRP kag sang NDFP sa bulig sang Royal Norwegian Government (RNG). Sa habig sang GRP, nagpirma diri sila Special Assistant to the President Antonio Ernesto F. Lagdameo Jr, ang emisaryo nga si Gen. Emmanuel T. Bautista (Ret) kag Presidential Adviser on Peace, Reconciliation and Unity Secretary nga si carlito Galvez Jr. sa habig sang NDFP, nagpirma sila ni Ka Juliet, Ka Luis, Ka Coni, kag Ka Nonoy. Ang pagpirma ang ginsaksihan ni RNG Special Envoy Christina Lie Revheim.

Ginpasalamatan sang NDFP ang RNG para sa mabakod nga suporta kag matutom nga pagtinguha sini para tabuon ang duha ka partido sa liwat nga pag-estoryahanay. Ang seremonya sang pagpirma sa Oslo ang gintambungan sang ministro sa angtanay pangluwas sang RNG nga si Espen Barth Eide kag iban nga mga upisyal sang Norway.

Puno sang tunok kag patalom

Samtang ginatinguhaan sang PKP ang pagpirma sang negotiating panel sa gin-isa nga pahayag, ginkilala sini nga puno sang tunok kag patalom ang banas sa pagbukas pa lang sang estoryahanay, kag ilabi padulong sa makatarunganon kag pangmalawigon nga kalinong.

Una nga katunga nga tikang pa lang ini sa liwat nga pagbukas sang negosasyon. Mahimo ini nga mapuli sa aktwal nga liwat pagbukas sang estoryahanay pangkalinong, mahimo man nga indi.

“May yara estoryahanay pangkalinong tungod may yara sang gyera,” paathag ni Marco Valbuena, punong upisyal sa impormasyon sang PKP. “Ang NDFP kag GRP ang nagatiglawas sa duha ka habig (co-belligerent) sang gyera sibil sa Pilipinas. Sila ang magkasumpong kag nagatiglawas sa lubos nga magkabanggi nga interes kag katuyuan, apang nagtabu sa negosasyon sa idalom sang deklarado nga katuyuan nga pag-angkon sang makatarunganon kag pangmalawigon nga kalinong.”

Sandig naman kay Ka Julie, ginapangatubang sang estoryahanay ang praktikal nga hambalanon kasubong sang terorista nga designasyon sang GRP sa PKP, BHB kag NDFP kag pati man kay Ka Luis. Amo man, mabudlayan ang NDFP sa negosasyon kung magapabilin nga nabilanggo ang mga konsultant sini nga iligal nga gindakop kag ginbilanggo sang GRP sa sulod sang nagligad nga anom ka tuig.