Sa palaabuton nga Disyembre 26, pagahiwaton sang Partido Komunista ng Pilipinas ang ika-55 nga anibersaryo sang pagkatukod sini. Isa sa pinakamataas nga katungdanan subong sang Partido ang palig-unon ang kaugalingon sa ideolohiya, pulitika kag organisasyon agud lubos nga paslawon ang kampanya sang pagsumpo sang kaaway, pamunuan ang masa sa pagbato sa papet, paantus kag pasistang rehimen US-Marcos kag isulong ang demokratikong rebolusyon sang banwa.

Gamiton naton nga okasyon ang anibersaryo agud liwat nga pabakuron ang panindugan sang tagsa ka kadre kag katapo, bag-uhan man ukon dumaan, nga ipadayon ang Marxismo-Leninismo-Maoismo kag sandigan nga mga prinsipyo sang Partido nga napahayag sa konstitusyon kag programa sini. Liwat naton nga ibayaw ang aton mga kamumuo kag ihambal ang aton mga kamao nga himuon ang tanan nga masarangan para pataason ang proletaryo nga rebolusyonaryong kamuklatan, kag alagaran kag itib-ong ang interes sang pumuluyo sa tanan nga panahon, pareho sang ginsumpaan sang tagsa sa pagpatapo sa Partido.

Hatagan man naton sang pasidungog sa Disyembre 16, ang rebolusyonaryo nga kabuhi ni Kaupod Jose Maria Sison, tigpangulo nga tigtukod sang Partido, sa okasyon sang una nga anibersaryo sang iya nga pagtaliwan. Hugot naton nga uyatan ang ginpanubli niya nga mga leksyon sa pagsulong sang rebolusyonaryo nga paghimakas sang pumuluyong Pilipino.

Dumdumon naton ang tanan nga martir kag baganihan sang rebolusyong Pilipino. Pinakamataas nga pasidungog sa ila ang padayon nga pag-uswag kag kapagsik sang armado nga paghimakas kag mga paghimakas masa. Lubos sini nga ginapamatud-an nga kabutigan ang ginahambal sang kaaway nga maubos kag mabungkag ang Partido, ang hukbo kag nagahiliugyon nga prente.

Nagaluntad ang kahimtangan nga pabor para ilabi nga pukawon, organisahon kag pahulagon ang malapad nga pumuluyong Pilipino. Madasig nga nagakadunot ang nagahari nga sistemang malakolonyal kag malapyudal sa Pilipinas. Wala-untat ini nga ginabayo sang magkadungan nga krisis sa ekonomiya kag pulitika tungod sa garuk, paantus, papet kag pasista nga paghari sang rehimen Marcos.

Nagadul-ong ini sang mas mabug-at nga pagpaantus sa pumuluyong Pilipino. Pinakaimportante nga katungdanan sang Partido nga pamunuan ang malapad nga masa sang pumuluyo nga ilabi nagahandum nga maghimakas para ipakigbato ang ila palangabuhian kag kaayuhan, kag pangapinan ang ila mga demokratiko nga kinamatarung.

Sa tunga sang lapnagon nga pangkatilingban nga kinagamo, yara sa pusisyon ang Partido nga pamunuan ang pagpagsik sang mga paghimakas masa, kag pasangkaron kag pabaskugon ang rebolusyonaryong kahublagan masa sa kasyudaran kag kabukiran, katimbang ang pangkabilogan nga pagpabuylo sa demokratikong rebolusyon sang banwa.

Ubos-kusog naton nga pasangkaron kag pabaskugon ang Partido kag ang organisadong kubay sang masa. Tadlungon ang mga sayop kag panginbabawan ang tanan nga mga kahuyangan kag pagpang-alang-alang. Butungon kag isahon ang kaakig sa dughan sang masa, kag pamunuan ang ila mga pagbato ilabi na sa atubang sang lala nga pagpamigos kag pagpanghimulos. Para sa bag-o nga mga katungdanan, kinahanglan naton sang bag-o nga mga pwersa nga puno sang katutom, kapagsik kag militansya. Buslan naton ang mga nadula kag nangluya.

Ginkalipay sang Partido ang gin-isa nga pahayag sang National Democratic Front of the Philippines (NDFP) kag sang Gubyerno ng Republika ng Pilipinas (GRP) sadtong Nobyembre 23 para liwat nga buksan ang estoryahanay pangkalinong.

Ginapangatubang naton ang inaway sa negosasyon katimbang sang armado nga paghimakas para lab-uton ang makatarunganon kag pangmalawigon nga kalinong. Katumbas sini ang pagsulong sang matuod nga reporma sa duta, pungsodnon nga industriyalisasyon, pungsodnon nga pagkilala kag matuod nga demokrasya.

Pamatukan ang paggamit diri sang reaksyunaryo nga estado bilang instrumento sa pagpaniplang para iduso ang BHB nga isungka ang mga armas, kag kuhaan sang kusog ang rebolusyonaryong kahublagan. Lubos nga sikwayon ang peke nga proklamasyon nga “amnestiya” sang rehimen Marcos nga ginpagwa para sa mapaniplang nga katuyuan sa pagpasungka. Nagaserbe lang ini sa pangkaugalingon nga interes sang pipila ka mga hambog nga nagtalikod kag nagtraydor sa interes sang pungsod. Dapat sila nga sikwayon, sawayon kag ihaboy sa basurahan sang kasaysayan.

Sa bug-os nga kalibutan, lutaw ang kahustohon nga maghimakas batuk sa dumuluong nga pagpanakop kag pasismo sa maisog nga armadong pakig-away sang pumuluyong Palestino, amo man sang mga pumuluyo sa Myanmar kag iban pa nga pungsod. Napanahon nga ginlunsar sang NDFP ang internasyunal nga teoretiko nga kumperensya angot sa imperyalistang gyera nga ginkabig nga okasyon para pabaskugon ang pagbinuligay sang nagkalain-lain nga proletaryo, anti-imperyalista kag mapanghilway nga kahublagan sa bug-os nga kalibutan, kag pabaskugon ang panawagan nga magsulong sang makatarunganon nga gyera kag armado nga paghimakas batuk sa imperyalistang gyera.

Ang mga komunistang Pilipino ang kabahin sang pangkalibutanon nga proletaryong rebolusyon batuk sa imperyalismo, ang ulihi nga hugna sang tagumatayon nga kapitalismo. Ginatiglawas sini ang rebolusyonaryo nga mapanghilway nga kahublagan sang pumuluyong Pilipino. Amot sini sa pangkalibutanon nga kahublagan anti-imperyalista ang pagbato sa nagalala nga hegemonismo sang US sa pungsod sa porma sang nagadamo nga base militar kag nagasako kag dalagkuan nga war games sa kadutaan sang Pilipinas. Dapat todo nga batuan sang bug-os nga pumuluyo ang paggamit sang US sa pungsod sa geopulitikal nga mga katuyuan sini sa Asia-Pacific, kag isugpon ini sa pangkalibutanon nga paghimakas para punggan ang pagdilaab sang inter-imperyalista nga gyera.

Sa kasyudaran kag kabukiran, tayuyon nga nagapabaskog ang Partido kag mga rebolusyonaryong pwersa. Ubos-kusog nga ginasulong ang rebolusyonaryong kahublagan masa sang tanan nga mga demokratikong sahi kag sektor agud ipakigbato ang tagsa nila ka interes. Padayon nga ginapabaskog kag ginapasangkad ang nagahiliugyon nga prenteng anti-pasista, anti-imperyalista kag antipyudal agud tukuron ang pinakamalapad nga paghiliugyon sang pumuluyo kag ihamulag ang nagahari nga rehimen Marcos. Pinakaimportante, padayon nga ginapabaskog ang BHB sa banas sang armadong paghimakas bilang nagapanguna nga hinganiban sang pagbato.

Nagasalig ang Partido nga sa hingpit nga pagpaninguha sang tanan nga kadre kag katapo, mapamunuan sini ang padayon nga pagpabaskog sang rebolusyonaryo nga paghimakas sa tanan nga larangan, kag magamadinalag-on ang pungsodnon-demokratikong rebolusyon sa Pilipinas padulong sa sosyalistang palaabuton.