Gipatay sa paturagas nga pagpamusil sa mga sundalo sa 74th IB ang mag-uumang si Pido Mendes sa Barangay San Jose, Mapanas, Northern Samar niadtong Nobyembre 22. Niadtong tungura anaa sa usa ka focused military operation ang maong yunit militar nga nakapailalum sa kumand ni BGen. Noel Vestuir sa 802nd IBde.

Gikan 2013, ginapig-ot na sa mga sundalo si Mendes, 60-anyos, human siyang nakaikyas sa pagdakop sa 34th IB. Sukad kaniadto, nagapuyo na siya sa iyang umahan sa bukid aron likayan ang mga sundalo.

Pag-aresto. Human ang hinimuhimong engkwentro sa 94th IB, giaresto sa mga sundalo ang mag-uumang si Pokoy Rebradilla, kauban ang iyang anak, sa Sityo Karanawan-Buli, Barangay Buenavista, Himamaylan City, Negros Occidental niadtong Disyembre 7. Gipailalum siya sa tortyur ug iligal nga gipriso sa kampo niini sa Barangay Tambo, Ayungon, Negros Oriental.

Pagdagit. Gidagit niadtong Disyembre 18 ug gipresenta isip “surrenderee” niadtong Disyembre 18 sa 11th IB ang duha ka mabdos nga hors de combat nga mga Pulang manggugubat sa Bagong Hukbong Bayan (BHB)-Southeast Negros. Gidagit sila sa Siaton, Negros Oriental ug kasamtangan ginatago sa militar.

Militarisasyon. Nagbubu og daghang tropang militar ang 62nd IB sa Binalbagan ug kasikbit nga mga lungsod sa Negros Occidental gikan Disyembre 9. Tumong niining pahilumon ug sumpuon ang mga paryente ug residente sa ilang panawagang hustisya alang kang Braulio “Banny” Tubalado nga gipatay sa mga sundalo niadtong Disyembre 6.

Kapin 100 ka sundalo sa 62nd IB ang nag-operasyon sa Sityo Sunflower sa Barangay Santol ug Sityo Tambo, Barangay Amuntay, pareho sa Binalbagan. Pugos nga gipabakwit sa mga sundalo ang 15 ka pamilya gikan sa Sityo Karanawan, Barangay Amuntay niadtong Disyembre 9. Mikabat sa 100 katawo ang apektado sa pagpabakwit, lakip ang mga bata.

Pagpamig-ot. Arbitraryong gidetine ug gi-deport sa rehimeng US-Marcos si Edna Becher, Filipina-Swiss nga aktibista ug lider sa Anakbayan-Switzerland, niadtong Disyembre 7. Gidetine siya sulod sa kapin duha ka oras sa NAIA Terminal 3 ayha pugos nga gipabalik sa Switzerland. Gibutang siya sa “blacklist” o mga gibawalang makasulod sa nasud bunga sa iya kunong “kontra-gubyernong mga aktibidad.” Usa si Becher sa mga aktibistang nagprotesta batok kang Marcos Jr sa Switzerland niadtong Enero.

Sa Bicol, ginapig-ot sa 903rd IBde si Reynard Magtoto, myembro sa National Union of Journalists of the Philippines (NUJP) ug tigmantala sa Baretang Bikolnon.

Samtang, nagpyansa niadtong Disyembre 18 ang duha ka lider-masa sa Cebu sa kasong frustrated homicide nga gipasaka sa militar. Nagpyansa silang John Ruiz III, koordineytor sa Bayan Muna Central Visayas, ug Jhonggie Rumol human mahibaloan ang kasong naglambigit kanila sa armadong engkwentro sa BHB ug AFP sa Toboso, Negros Occidental niadtong Abril.