Pinatay iti awan sarday a panagpalpaltog dagiti soldado ti 74th IB ti mannalon a ni Pido Mendes idiay Barangay San Jose, Mapanas, Northern Samar idi Nobyembre 22. Adda iti kangitingitan idi ti focused military operation ti makuna a yunit militar a nakapa-uneg iti kumand ni BGen. Noel Vestuir ti 802nd IBde.

Manipud 2013, tuntuntonen da ni Mendes, 60, dagiti soldado kalpasan isuna a makatakyas iti panangtiliw ti 34th IB. Agsipud idi, agnanaeden isuna iti suksukayen na a daga idiay bantay tapno liklikan dagiti soldado.

Panagaresto. Kalpasan ti pinaruar nga engkwentro ti 94th IB, tiniliw dagiti soldado ti mannalon a ni Pokoy Rebradilla, kakuyog ti anak na, idiay Sityo Karanawan-Buli, Barangay Buenavista, Himamaylan City, Negros Occidental idi Disyembre 7. Pinalak-am isuna iti tortyur ken iligal nga imbalud iti kampo dagitoy idiay Barangay Tambo, Ayungon, Negros Oriental.

Panagdukot. Dinukot idi Disyembre 18 ken imprisinta kas “surenderi” idi Disyembre 18 ti 11th IB dagiti dua a masikog nga hors de combat kas mannakigubat ti New People’s Army (NPA)-Southeast Negros. Pinidot ida idiay Siaton, Negros Oriental ken agdama nga ilemlemmeng ti militar.

Militarisasyon. Nangibuntuon ti mano gasut a tropa militar ti 62nd IB idiay Binalbagan ken dagiti kaasideg nga ili idiay Negros Occidental agsipud Disyembre 9. Panggep daytoy a paulimeken ken ilupit-lupit dagiti kabagian ken residente iti panawagan da nga hustisya para kenni Braulio “Banny” Tubalado a pinatay dagiti soldado idi Disyembre 6.

Surok 100 soldado ti 62nd IB ti nagoperasyon idiay Sityo Sunflower idiay Barangay Santol ken Sityo Tambo, Barangay Amuntay, agpada idiay Binalbagan. Inkapilitan a pinapanaw dagiti soldado ti 15 pamilya manipud idiay Sityo Karanawan, Barangay Amuntay idi Disyembre 9. Dimmanon iti 100 katao ti apektado ti panangpapanaw, karaman dagiti ubbing.

Panangliplipit. Arbitraryo nga indetine ken indeport ti rehimen US-Marcos ni Edna Becher, Filipina-Swiss nga aktibista ken daulo ti Anakbayan-Switzerland, idi Disyembre 7. Impupok isuna ti surok dua oras idiay NAIA Terminal 3 sakbay a pwersaan a pinasubli idiay Switzerland. Inkabil isuna iti “blacklist” wenno dagiti pinaritan a makaserrek iti pagilian gapu kano kadagiti “kontra-gobyerno nga aktibidad” na. Maysa ni Becher kadagiti aktibista a nagprotesta laban kenni Marcos Jr idiay Switzerland idi Enero.

Idiay Bicol, liplipiten ti 903rd IBde ni Reynard Magtoto, kameng ti National Union of Journalists of the Philippines (NUJP) ken agpadpadamag ti Baretang Bikolnon.

Kabayatan na, nagpyansa idi Disyembre 18 ti dua a lider-masa idiay Cebu iti kaso a frustrated homicide ngainsampa ti militar. Nagpyansa da John Ruiz III, koordineytor ti Bayan Muna Central Visayas, ken Jhonggie Rumol kalpasan a maammuan ti kaso a nangisilpo kadakuada iti armado nga engkwentro ti NPA ken AFP idiay Toboso, Negros Occidental idi Abril.