Raling-pinakilab sa KM. Mapangahasong gilunsad sa Kabataang Makabayan (KM) ang protestang pinakilab sa kadalanan sa Recto Avenue sa Maynila niadtong Disyembre 10. Nagraling-pinakilab usab ang KM-Southern Tagalog sa UP-Los Baños niadtong Disyembre 19. Gipahigayon nila kini taliwala sa pagbutang sa rehimeng US-Marcos sa organisasyon sa listahan sa mga “teroristang organisasyon.” Ang rali kabahin sa pagsaulog sa ika-59 nga anibersaryo sa KM niadtong Nobyembre 30.

Pagpanangtang sa Converge ICT. Supak ang mga mamumuo sa Converge ICT sa pagtangtang sa 600 ka mamumuo sa Metroworks (igsuong kumpanya sa Converge) sa tibuok Metro Manila niadtong Nobyembre. Nagpiket sila sa sa Regional Conciliation and Mediation Board-NCR sa Quezon Avenue, Quezon City niadtong Disyembre 6 kadungan sa pagdungog sa “redundancy program” ug “cost-cutting” sa kumpanyang Converge ICT. Gipanag-iyahan ang kumpanya ni Dennis Anthony Uy nga taga-Angeles City.

Petisyon kontra NTF-Elcac sa Negros. Nagprotesta atubangan sa lokal nga Commission on Human Rights sa Bacolod City niadtong Disyembre 7 ang mga mag-uuma ug kabus nga Negrosanon aron iduso ang hinanali nga pagbungkag sa National Task Force-Elcac. Kadungan niini, nagsumite sila og pormal nga petisyon ug nakigdayalogo sa mga upisyal sa ahensya. Gipirmahan sa 1,500 ka mag-uuma ug kabus ang petisyon. Gipangunahan ang pagpetisyon sa Human Rights Advocates Negros ug Kilusang Magbubukid ng Pilipinas-Negros.

Pribatisadong serbisyong patubig sa Bulacan, gibatikos. Nagprotesta atubangan sa upisina sa Water District sa Barangay Minuyan III, San Jose del Monte, Bulacan ang mga myembro ug tigsuporta sa Alliance for Consumers Protection-CSJDM niadtong Disyembre 11 aron sawayon ang pangit nga serbisyo ug patung-patong pang mga singil niini sa mga konsyumer. Gipribatisa ang serbisyong patubig gikan niadtong Mayo 2018 dihang misulod ang lokal nga gubyerno sa joint venture agreement kauban ang PrimeWater Infrastructure Corporation sa pamilyang Villar.

Mga mangingisda sa Sorsogon, nagmalampuson. Napatangtang sa mga mangingisda sa Gubat, Sorsogon ang pipila sa anti-mangingisdang probisyon sa Fishery Administrative Order No. 264 sa Bureau of Fisheries and Aquatic Resources niadtong Disyembre 11 human ang pagpetisyon ug hiniusang protesta sa Save Gubat Bay Movement sugod pa niadtong Hunyo. Pagatugutan na sila subling manikop og mga king crab nga dili makatarunganong gibawal sa ahensya.