Rinambakan ti rebolusyonaryo a tignayan idiay India, iti panangidaulo ti Communist Party of India (Maoist), ti maika-23 anibersaryo ti armado a takiag daytoy, ti People’s Liberation Guerilla Army (PLGA), manipud Disyembre 2 aginggana Disyembre 8. Naibangon ti PLGA idi Disyembre 2, 2000. Kagiddan daytoy, laglagipen met ti rebolusyonaryo a tignayan idiay India ti pannakapapatay ti tallo a kameng ti Komite Sentral ti Partido da idi Disyembre 2, 1999.

Itatta a tawen, indeklara met ti CPI-Maoist ti lawas kas Palestine People’s Struggle Action Week. Pannakikaykaysa daytoy iti napnuan pakasaritaan a pannakidangadang ti umili a Palestino laban iti panagsakop ken henosidyo ti Zionista nga Israel, a suportado ti imperyalista nga US.

Segun iti Komite Sentral ti CPI (Maoist), nainkalintegan ti armado a panaglaban ti umili a Palestino laban iti panagsakop ken nasken daytoy a suportaran. Rumbeng kano nga agtignay dagiti umili tapno pasungbaten dagiti kriminal iti gubat ti Zionista nga Israel.

“Iti pagilian mi, imparit ti pasista a ni Modi, kas kenni Netanyahu ti Israel, a mangitantandudo ti mandar ti imperyalismo nga US, ti uray ania nga oposisyon iti takder na iti agdama nga henosidyo kadagiti Palestino,” pahayag ni Kadua Amrut, tagapagsarita ti CPI (Maoist) kadagiti internasyunal nga isyu.