Ti kapaskuaan, para iti ad-adu kadagiti overseas Filipino worker (OFW), ket saan laeng a maysa a panawen ti panagrambak ngem ketdi maysa a panawen met ti pannakailiw ken panagarapaap. Ti tartarigagayan da a regalo: makadenna dagiti ipatpateg da iti biag.

Iti tengnga ti nakaro a krisis iti ekonomya, dagiti karit pangkagimongan, ken agtultuloy a pampulitika a riribuk iti intero a lubong, adu nga OFW ti sumangsango iti napait a kinapudno a ti arapaap da a panagawid ket mabalin a saan a matungpal itatta a Paskua wenno iti asideg a masangoanan.

Pagsarmingan da Miriam, maysa a caregiver, ken Ana, maysa a domestic worker, idiay United Kingdom, ti arapaap ti adu nga OFW nga agkalikagom a makaawid ngem mapawpawilan ti adu a lapped. “Nu dakami laeng ti masurot, kaykayat mi ti makaawid. Ngem nagngina ti plete ken kanayon kami a laplappedan ti nakarigrigat a kasasaad idiay Pilipinas. Nu saan kami a makasubli ditoy, kasanon?” kunada.

Para met kenni Carlos, maysa a seaman nga apagbiit a simmanglad idiay Southampton, England, “Saan a bale nga awanan nak ti noche buena, ti importante ket makapagpaw-itak ti kwarta ken regalo iti pamilyak. Uray man laeng iti kasdiay a pamuspusan marikna ti pamilyak a kadua dak itatta a Paskua.”

Mataytaya nga addaan nasurok-kumurang 300,000 migrante a Pilipino idiay United Kingdom, daytoyen ti kadakkelan a populasyon dagiti OFW iti intero a Europe. Kabayatan na, agtaltalinaed nga addaan 75% ti kabuklan a populasyon dagiti seafarer ti lubong ket dagiti Pilipino.

Komun ti arapaap da amin: edukasyon para kadagiti annak da, maysa a naurnos a pagnaedan, ken natibker a masakbayan idiay Pilipinas para kadagiti ipatpateg da iti biag. Iti bangir daytoy, dagiti karit pampinansya, pannaka-ilumlom iti utang, kinaawan seguridad ken kinaawan manamnama idiay Pilipinas ti agtultuloy a mangparparigat kadagiti kasasaad da.

Iti nabiit, rimuar ti maysa kampay idi a panagamiris ti gobyerno a mangibagbaga nga adu kano nga OFW ti “agpangpanggep” nga agawid kalpasan ti lima tawen sadiay ballasiw-taaw. Saan daytoy nga agpayso idi, ken lalo nga danog iti bulan daytoy itatta.

Ti kumarkaro a krisis iti ekonomya iti Pilipinas a ginaladan ti panaglobo ti presyo dagiti gagatangen ken basaran a serbisyo, kinaawan daga a masukay ken trabaho, kannigid-kannawan a parigat a patakaran ti gobyerno ket gapuanan ti kinaawan-seguro iti panagawid dagiti OFW. Kaaduan kadakuada ket rimuar ti pagilian gapu ta awan trabaho nga addaan makabiag a sweldo idiay Pilipinas. Maburiboran da a kas pangarigan agsublida idiay Pilipinas, mabalin a dumoble wenno triple ti nayon a pinansyal a baklayen da ken kinaawan ti seguridad iti trabaho.

Dagiti kontra-migrante ken kontra-mangmangged a patakaran, panagngato ti balor ti panagbiag ken kinaawan trabaho idiay Pilipinas ti kangrunaan a makagapu nu apay nga agsarsarimadeng dagiti OFW nga agawid. “Ti panggep nga agawid, adda latta dita. Ngem kanayon mi a timtimbangen ti adu a banag. Saan a kumporme a desisyon daytoy a mabalin a keddengan ti lima wenno mano tawen laeng,” kuna ni Carlos.

Nu talaga a kayat ti gobyerno nga agawiden dagiti OFW, rumbeng a siguraduen da nga adda umdas nga oportunidad para kadakami tapno agbiag kami ken maisakad mi dagiti pamilya mi. Nabayagen nga ibagbaga a dagiti remitans dagiti OFW ti salbabida ti ekonomya tayo, ngem apay aginggana itatta, awan latta panagdur-as?’ kuna ni Miriam.

Nayon pay ni Ana, “San tu madamag mi a ni Presidente (Marcos), kankanayon ti panag-abroad. Imbag pay isuna nu kayat na ti ag-abroad ken agawid ti pagilian, uray kaano a kayat na, mabalin na nga aramiden. Dagiti “official trip” kano dagidiay, naggapu iti kinabaknang ti pagilian. Idiay kadi a mapmapan dagiti remitans mi?”

Kuna ti Migrante International, tapno masolbar ti problema ti pwersaan a migrasyon dagiti mangmangged a Pilipino, saan a patakaran a labor export ngem ketdi trabaho ken makabiag a sweldo idiay Pilipinas ti rumbeng a sungbat ti gobyerno.

Idi Disyembre 18, linagip dagiti migrante a mangmangged ken dagiti pamilya da ti Sangalubongan nga Aldaw dagiti Migrante babaen iti panangkundenar iti rehimen Marcos iti panangbaybay-a na kadagiti kagyat nga isyu dagiti OFW ken migrante a Pilipino kagiddan ti panangpairteng na iti programa a labor export.

Kabayatan na, iti bangir dagiti karit ken kinaadayo, agtultuloy a mangnamnama dagiti OFW a dumteng ti aldaw, makaawid da metten ken makadenna dagiti ipatpateg da ti biag iti maysa a pudno a naparabor a Paskua para kadagiti pamilya da ken gimong a Pilipino.