Awan lugar iti tungtungan pangkappia iti panagtungtong, uray panagpasagid, aglalo panagkiddaw, para iti panagsuko ti National Democratic Front of the Philippines (NDFP) wenno ti armado a rebolusyonaryo a pannakidangadang iti Pilipinas. Daytoy ti pahayag ni Kadua Luis G. Jalandoni, Senior Adviser iti Negotiating Panel ti NDFP, iti sango ti nagsasaruno a pahayag dagiti opisyal ti Gobyerno ti Republika ti Pilipinas (GRP) ken Armed Forces of the Philippines (AFP) a mangiladladawan iti tungtongan pangkappia kas tungtongan a “panagpasuko.”

Napirmaan idi Nobyembre 23 ti Oslo Joint Statement idiay pagilian ti Norway a nangideklara ti panggep ti GRP ken ti NDFP nga angayen manen ti ti tungtungan pangkappia.

Partikular a dinillaw ni Kadua Juliet de Lima, interim chairperson ti NDFP Negotiating Panel, ni Gilberto Teodoro Jr, sekretarya ti Department of National Defense, iti imbaga na a ti panagsuko ti NDFP ti basaran ti GRP iti pannakitulag manen a lukatan ti negosasyon. Kunana, maliplipatan ni Teodoro a ti GRP ti immasideg iti NDFP ken saan a ti kabaliktad na.

Kunada Ka Luis ken Ka Julie,”ti tungtungan pangkappia ket saan a tungtungan para iti kapitulasyon.” Panangitalmeg da, ti negosasyon ket maysa a naisangsangayan a gundaway tapno makabiruk ti pamuspusan a kaawat-awat iti dua a benneg ken prinsipyado tapno naan-anay a sungbatan dagiti pudno a rason ti armado a risiris.

Rumbeng kano nga ikabil laengen ti GRP ti atensyon iti importante nga adyenda ti negosasyon a nakalanad iti The Hague Joint Declaration. Kaipapanan daytoy ti panagtalakay iti borador ti Comprehensive Agreement on Social and Economic Reforms (CASER), a mangipalpalawag kadagiti sosyo-ekonomiko a ramut ti armado a risiris.

Suporta iti NDFP

Adda iti likudan ti NDFP negotiating panel dagiti alyado nga organisasyon na iti panangirupir kadagiti basaran ken kagyat a kiddaw ti umili para iti reporma iti daga ken nailian nga industriyalisasyon ken dadduma pay nga addangen para iti hustisya a pangkagimongan ken nailian a soberanya. Ibagbagi da ti nailian ken demokratiko nga interes dagiti bukod da a sektor.

Kasilpo ti napirmaan nga Oslo Joint Statement, nagiruar ti suporta a pahayag ti nailian a pannakadaulo ti Makabayang Kilusan ng Bagong Kababaihan (Makibaka), Liga ng Agham para sa Bayan (LAB), Katipunan ng mga Gurong Makabayan (Kaguma), Lupon ng Manananggol para sa Bayan (Lumaban), Christians for National Liberation (CNL), kasta met ti Partido Komunista ng Pilipinas ken New People’s Army.

Silulukat met nga inawat dagiti pangrehiyon ken pamprobinsya a balangay ti NDFP. Idurduron itatta dagiti rebolusyonaryo nga organisasyon ti panagadal ken panagsubli-adal kadagiti insurat ken pahayag ni Kadua Jose Maria Sison, ti NDFP ken ti Partido nga addaan silpo iti tungtongan pangkappia tapno reppeten ken anien ti suporta ti mas nalawa a masa a Pilipino.

Ania ti rumbeng a pagtungtungan?

Rumbeng a pagtungtongan ti nasaknap a kinaawan ti daga a masukay ti masa a mannalon iti kaaw-awayan. Gapu ta maysa a gubat ti mannalon ti gubat ti umili, tulbek a banag ti panangitandudo iti pudno a reporma iti daga. Repreppeten ti Pambansang Katipunan ng mga Magbubukid (PKM) ti pigsa ti mannalon tapno itandudo dagitoy a pannakidangadang.

Awan naganab ti masa a mannalon kadagiti ubbaw a reporma iti daga ti reaksyonaryo nga estado. Dinakamat ti PKM-Laguna ti kaso ti konsentrasyon ti daga kas ti 7,100 ektarya nga adda iti ima ti pamilya Yulo, kadakkelan nga asyenda iti Laguna, a mangsaksaklaw iti Calamba, Cabuyao, Sta.Rosa, ken Biñan.

Kuna iti PKM-Laguna, nasaknap ti panagpatakyas kadagiti mannalon iti kadagaan dagiti Yulo nga ilaklako kadagiti dadakkel a burgesya kumprador kas kadagiti Ayala. Ipapauneg iti panagsukat-usar dagiti irigado a daga agturong kadagiti golf course, subdibisyon, industrial park, ken dadduma pay a komersyal nga usar, nga awan pagnumaran iti masa a mannalon. “Kasano kami nga agmula kadagiti sementado a kalsada ken dagiti aspalto a patpatakderan ti agkakadakkel a pasdek? Bisin ti madanunan minu agtultuloy daytoy,” pahayag ti PKM-Laguna.

Rumbeng a pagtungtungan ti panangiyabante ti nailian nga industriyalisasyon. Ti panangitandudo kadaytoy ket makatulong iti panagpadur-as ti ekonomya. Kasapulan daytoy tapno makapataud kadagiti trabaho, ingato ti birok ken sungbatan dagiti basaran a kasapulan ti umili.

Rumbeng a pagtungtungan ti nasaknap a kinarigat, kinaawan trabaho ken nababa a sweldo ti masa a mangmangged. Segun mismo iti estadistika ti estado, dimmanon iti 2.3 milyon a trabaho ti nailista a naaawan idi Setyembre. Nayon kadagiti naawan a trabaho ti 358,000 nga inregreg iti pwersa ti panagubra iti kapada a panawen. Umad-adu met ti bilang ti agub-ubra iti impormal nga ekonomya.

Agtultuloy a marunrunot ti pudno a balor ti sweldo dagiti mangmangged. Idiay NCR, ₱504 laengen ti pudno a balor ti maaw-awat a minimum a ₱610. Awan pay daytoy iti kagudua ti ₱1,189 kada aldaw a tukad ti makabiag a sweldo. Iti abereyds, 35.5% laeng iti makabiag a sweldo ti maaw-awat dagiti mangmangged iti intero a pagilian.

Rumbeng a pagtungtungan ti agdadata apanangsursurot ti rehimen Marcos iti among na nga imperyalista nga US. Baybay-an na nga parangguyoden ti US ti Pilipinas iti panaggil-ayab ti inter-imperyalista a gerra laban iti China, ken ipapa-usar ti intero a pagilian kas base iti uneg ti Enhanced Defense Cooperation Agreement ken dadduma pay a bangbangir a tratado militar.

Rumbeng met a pagtungtungan ti panangsalaknib iti nailian a soberanya ti Pilipinas laban iti pannakibiang ken panangatake ti imperyalista a China iti West Philippine Sea.

Rumbeng a pagtungtungan ti panaggun-od ti hustisya iti rinib-ribu a biktima dagiti panaglabsing iti karbengan-tao. Manipud Disyembre 1, 2022 aginggana Disyembre 1 itatta a tawen, nailista ti Ang Bayan ti 957 kaso ti panaglabsing iti karbengan-tao ken 127,386 biktima ti rehimen US-Marcos. Awan aniaman iti panangdalapos kadagiti komunidad iti kaaw-awayan ti armado a pwersa na, usar ti kampanya nga aerial bombing, panagkanyon ken panagistraping.

Dagitoy ken dadduma pay a sosyo-ekonomiko a bambanag, ti pilit a likliklikan ken kayat a gaburan ti rehimen a US-Marcos iti posible manen a panaglukat ti negosasyon.