Linagip babaen kadagiti kumperensya ken pangkultura a panagpabuya ti umuna a tawen ti panagmartir ni Kadua Jose Maria Sison, natan-ok a lider, mannuro ken komunista a Pilipino.

Nagummong iti University of the Philippines (UP)-Diliman ti ginasut nga indibidwal, kapada a beterano nga aktibista ken agtutubo, para iti maysa a talakayan ken repleksyon kadagiti insurat ni Ka Joma. Inawagan a “Reflections on Palestine, the Philippines, and the Struggle for a Just and Lasting Peace,” nangted kadagiti repleksyon wenno personal a panangiladawan dagiti bisita ti aktibidad kadagiti insurat ni Ka Joma karaman ti “Our Urgent Tasks,” artikulo iti agresyon ken masaker ti Israel iti umili a Palestino, dagiti insurat iti tungtungan pangkappia iti nagbaetan ti NDFP ken GRP, “On Revolutionary Violence,” ken ti naudi a pahayag na nga “Saan a maparmek ti demokratiko a rebolusyon ti umili a Pilipino.”

Idiay Utrecht, The Netherlands, nagummong dagiti kadua ken gayyem ti rebolusyonaryo a tignayan iti Pilipinas iti opisina ti NDFP International nu sadinno a nasingked dagiti pannao, saniweng, panagbasa ti daniw ken daduma pay a tipo ti kultural a panagpabuya tapno lagipen ti namaris ken napnuan-adal a biag ni Ka Joma.

Inrussuat met dagiti yunit ti Partido Komunista ti Pilipinas ken New People’s Army iti intero a pagilian ti nadumaduma nga aktibidad tapno lagipen ken saluduan ni Ka Joma. Iti sumagmamano a larangan, inggiddan kadaydiay nga aldaw ti panagsapata manen iti bandera ti Partido tapno pasingkedan ti sipupuso a panagserbi iti umili a Pilipino ken panangidaton ti biag iti panangiballigi ti demokratiko a rebolusyon ti umili.