Linagip iti protesta dagiti demokratiko a grupo idiay Metro Manila ti Sangalubongan nga Aldaw ti Karbengan-Tao ken ti kasilpo a maika-75 anibersaryo ti Sangalubongan a Deklarasyon iti Karbengan Pangtao idi Disyembre 10. Adda dagiti kapada a protesta kadagiti syudad ti Baguio, Legazpi, Naga, Bacolod, Cebu, Iloilo, Roxas, Davao ken idiay ili ti Kalibo idiay Aklan.

Indauloan ti Karapatan ken Bagong Alyansang Makabayan (Bayan) ti rinib-ribu a Pilipino a nagprotesta iti 11 sentro ti panagtignay iti pagilian tapno singiren ti reaksyonaryo a gobyerno kadagiti panaglabsing na iti karbengan-tao iti surok 1.6 milyon Pilipino manipud nagtugaw ni Marcos iti poder.

Laksid daytoy, kinundenar dagiti grupo ti papel ti US iti manangdadaela kontra-insurhensya a kampanya ti rehimen a tinudingan da a paset ti pannakibiang iti pagilian ken iti Asia-Pacific. Inwaragawag da met iti protesta ti pannakimaymaysa iti umili a Palestino a makapadpadas ti awan kabatog a panagsagaba gapu iti kampanya nga henosidyo ti US-Israel idiay Gaza ken West Bank.