Dagiti maudi a bulan ti 2023 ket kinalatakan ti naparpartak a panagirteng ti krisis ti malakolonyal ken malapyudal nga agturturay a sistema iti poder ti parigat, aso-aso ken pasista a rehimen nga US-Marcos. Awan anawa ti panagngato ti presyo dagiti gagatangen, panagbuntog iti taray ti ekonomya, panagkaro ti korapsyon, ken panagdakkel ti utang ti gobyerno.

Imbunga dagiti parigat a patakaran ti rehimen a Marcos, agtultuloy a kumarkaro ti saad iti biag ti masa a Pilipino, panagkaro ti kinaawan trabaho, panangagaw iti pagbiagan, kinaawan ti pagsapulan, nababa a sweldo, rigat ken bisin.

Iti bangir a benneg, agtultuloy a panaglaban ken protesta ti sungbat ti nadumaduma a sektor iti panangparparigat ken panangikuskuspil kadakuada ti rehimen a US-Marcos. Kadagitoy naglabas a lawas, agsasaruno a sardeng-pasada ken dagiti tignay-protesta ti inrussuat iti intero a pagilian laban iti agngayngayangay a panangipatungpal kadagiti addangen a mangipaidam iti karbengan iti pagbiagan dagiti ginasut-ribu a drayber ken opereytor ti dyip. Laksid kadaytoy, agtultuloy met nga umab-abante dagiti panaglaban ti nadumaduma a demokratiko a sektor kas kadagiti mangmangged, mannalon, mangngalap, manursuro, mangmangged pangsalun-at, agtutubo-estudyante ken dadduma pay para kadagiti kiddaw pang-ekonomya ken panawagan pampulitika.

Daytoy nga in-inut a rumegregta a panaglaban ket sigurado a pumartak kadagiti sumaruno a bulan iti umay a tawen, kagiddan ti namnamaen a panagsuek ti napnuan-krisis a sistema iti poder ti panagturay ti rehimen a US-Marcos. Laksid kadagiti isyu a pang-ekonomya wenno pangkabiagan, agsasanggala pay nga isyu pampulitika, kas ti panangipatakder kadagiti barbaro a base militar ti US, charter change, dagiti panaglabsing iti karbengan-tao, ken dadduma pay ti sigurado a mangiduron kadagiti umad-adu ken dumakdakkel a tignay-protesta iti kalsada, talakayang-bayan ken panaglawa ti organisado nga intar ti masa.

Iti sumaruno a tawen, rumbeng nga ipinget ken nakired nga aggawaing masa dagiti nailian-demokratiko a pwersa tapno nalawlawa pay a gaw-aten ken epektibo nga idauloan ti masa kadagiti pannakidangadang da. Sistematiko ken awan-babannugan a gaw-aten ti kapuskulan nga intar ti masa. Buklen dagiti ginasut a timpuyog tapno agorganisa ken agpropaganda iti masa. Agtultuloy ida a sanayen ken armasan tapno ingato ti kabaelan ken padur-asen dagiti pamuspusan iti panangidaulo iti masa. Rumbeng nga iyaramid da iti inaldaw-aldaw dagiti pampulitika a talakayan ken dagiti aktibidad tapno ingato ti kaammuan da ken kapanunotan ken patademen ti panunot da iti panagamiris kadagiti bambanag. Mangbukel ti nalawag a plano tapno siguraduen a tukad-tukad a dumakdakkel ti bilang ti magawgaw-at a masa kada malpas a lawas ken bulan kadagiti empresa, komunidad, eskwelaan, opisina ken dadduma pay nga addaan konsentrasyon ti masa.

Rumbeng nga isayangkat dagiti nailian-demokratiko a pwersa ti nasaknap a kampanya ti pangkagimongan a panagsukisok ken panagamiris kadagiti dasig kadagiti nadumaduma a lugar ken sektor. Rebbengen dagiti nadumaduma a tukad ti sistematiko a panagurnong kadagiti impormasyon ken datos tapno ammuen dagiti partikular a kasasaad ken problema a sangsanguen ti masa iti balabala ti malakolonyal ken malapyudal a sistema. Rumbeng nga amirisen manipud iti naindasigan a pannirigan ti proletaryado dagitoy a datos tapno ipakita ti sagsagrapen a panangidadanes ken panangikuspil iti masa. Rebbengen nga isilpo daydiay kadagiti isyu a sangsanguen ti intero a pagilian ken ilaksid dagiti parparbo a kinaulbod ti agturturay a rehimen. Rumbeng nga ammuen dagiti annatop a panawagan a mangriing kadakuada ken dagiti pamuspusan kasano ida nga organisaen ken patignayen iti nailian-demokratiko a tignayan. Ipinget nga itandudo ti maysa a nasaknap a tignayan propaganda-edukasyon iti intar ti masa a naan-anay a mangipakpakita iti kontra-marigrigat ken makaganggannaet a rehimen US-Marcos. Ingato ti kapanunotan ti masa ken riingen ti militansya da ken pigsa’t pakinakem nga agkukuyog nga ilaban ti demokratiko nga interes ken karbengan da iti balabala ti reaksyonaryo a linteg kabayatan a saan nga agpa-igalot ditoy. Napasnek nga ibutaktak a ti rehimen US-Marcos ken ti reaksyonaryo nga estado a pampulitika a mangibagbagi ti agturturay a dasig ket us-usaren tapno pagserbian ti interes ti agturturay a burgesya komprador ken dadakkel nga apo’t daga, ken dagiti ganggannaet a banko ken kumpanya.

Ingato ti kabaelan dagiti nailian-demokratiko a pwersa a napartak nga agiruar kadagiti pahayag nga agam-amiris kadagiti isyu tapno agserbi a tarabay iti panagamiris ken panagtignay ti masa. Palabbagaen ti syudad ken kaaw-awayan kadagiti patriyotiko ken demokratiko a pukkaw ti umili. Paglayusen ti amin nga annatop a langa ti pasagad ken solido a propaganda a diretso a dumandanon iti masa. Angayen dagiti asembliya ken dagiti apagbiit a presentasyon kadagiti pabrika, eskwelaan, simbaan, pagtagilakuan, terminal, ken dagiti komunidad para kadagiti talakayang-bayan wenno agkukuyog nga agbuya kadagiti progresibo a sine, dokumentaryo wenno panagpadamag. Irussuat dagitoy saan laeng tapno agbuya wenno agdengngeg ti masa, ngem ketdi tapno ikkan ida ti gundaway nga agiruar kadagiti arungaing, agited ti pannirigan ken makipagkaykaysa.

Rumbeng a ringbawan amin dagiti makagapu ti panagtamnay ken manglaplapped iti panagabante ti demokratiko a tignayan masa. Ammuen, ramuten ken ilaksid amin a bagahe a manglaplapped iti panagabante ti masa, karaman ti amin a langa ti panagpangngadua ken panagbuteng iti intar ti masa ken organisado a pwersa. Maringbawan amin dagitoy babaen iti panagabante ken panangidaulo iti pannakilaban. Adu dagiti baro a rebbengen a kasapulan nga akemen, isu a kasapulan a patauden ti ad-adu a baro a pwersa. Ti apoy dagiti pannakidangadang masa kadagiti umay a bulan ti mangpanday kadagiti baro a platun dagiti nailian-demokratiko a pwersa a tumaud manipud iti intar ti masa, a mangnayon iti regta ken tured ti tignayan masa iti syudad ken kaaw-awayan.

Agtalek kadagiti baro a pwersa aglalo iti intar dagiti naub-ubing nga henerasyon: situtured ida nga ikkan ti responsibilidad, tarabayan, tasaen ken lagumen ti kapadasan para iti napartak a panagdur-as ken panagbaklay kadagiti dumakdakkel a trabaho. Kagiddan daytoy, agtultuloy a mangpataud kadagiti baro a kadre a mangidaulo kadagiti trabaho ken irussuat ti komprehensibo a panagsanay kadakuada iti ideolohiya, pulitika ken organisasyon.

Rumbeng a papigsaen ti Partido ken dagiti rebolusyonaryo a pwersa ti panangidaulo na iti agtultuloy a panagparegta ti rebolusyonaryo a tignayan masa agpada iti syudad ken kaaw-awayan. Kagiddan daytoy iti kangrunaan a rebbengen nga idauloan ti New People’s Army ken panangiyabante ti rebolusyonaryo nga armado a pannakidangadang iti kaaw-awayan.