Nagprotesta iti opisina ti Land Transportation Office (LTO) iti Quezon City idi Disyembre 18 dagiti drayber ti bus manipud iti naduma-duma a kompanya tapno ipabasura ti saan a nainkalintegan a Demerit Points System ti ahensya nga impatungpal idi pay 2019. Indauloan ti panagtignay iti Manibela wenno Malayang Alyansa ng Bus Employees at Laborers.

Nangitennag ti nakuna a sistema, a paset iti Republic Act 10930, ti doble-doble a “demerit points” para kadagiti drayber iti pampubliko a lugan maiyarig kadagiti pribado a lugan. Segun kadaytoy, nu naaddaan ti maysa a drayber ti 40 “demerit points” gapu kadagiti “panaglabsing” iti linteg ti trapiko, maipaidam iti lisensya na iti dua tawen.

Rinib-ribu a drayber ken mangmangged ti bus ti mariribuk ken agpeggad a maawanan ti pagbiagan gapu kadaytoy. Lallalo daytoy a kimmaro iti napalabas a bulbulan idi nakikumplot dagiti lokal a gobyerno ken coast guard iti panagipatungpal iti patakaran. Rupir da, basul met laeng iti nawara a sistema ti transportasyon nu apay a “malablabsing” dagiti drayber dagiti patakaran iti trapiko. Awan kan met maipatpatungpal a naurnos a pangiluganan ken pangidissaagan kadagiti pasahero.