Gidumdum pinaagi sa mga kumperensya ug kulturanhong pagsundayag ang unang tuig sa pagkamartir ni Kaubang Jose Maria Sison, batugang lider, magtutudlo ug komunistang Pilipino.

Nagtapok sa University of the Philippines (UP)-Diliman ang gatusan ka indibidwal, parehong mga beterano ug batan-ong aktibista, alang sa usa ka diskusyon ug repleksyon sa mga sinulat ni Ka Joma. Gitawag og “Reflections on Palestine, the Philippines, and the Struggle for a Just and Lasting Peace,” naghatag og mga repleksyon o personal nga paghulagway ang mga bisita sa aktibidad sa mga sinulat ni Ka Joma lakip ang “Our Urgent Tasks,” artikulo sa agresyon ug masaker sa Israel sa katawhang Palestino, mga sulatin sa panaghisgot kalinaw tali sa NDFP ug GRP, “On Revolutionary Violence,” ug iyang ulahing pamahayag nga “Dili mabuntog ang demokratikong rebolusyon sa katawhang Pilipino.”

Sa Utrecht, The Netherlands, nagtapok ang mga kauban ug higala sa rebolusyonaryong kalihukan sa Pilipinas sa upisina sa NDFP International kung asa tataw ang mga pagpamahayag, pagkanta, pagbasa og tula ug uban pang tipo sa kulturanhong pasundayag aron dumdumong ang mabulukon ug makahuluganong kinabuhi ni Ka Joma.

Gilunsad usab sa mga yunit sa Partido Komunista ng Pilipinas ug Bagong Hukbong Bayan sa tibuok nasud ang lain-laing aktibidad aron dumdumon ug pasidunggan si Ka Joma. Sa pipila ka nataran, gidungan sa maong adlaw ang subling pagpanumpa atubangan sa bandera sa Partido aron palig-onon ang tibuok kasingkasing nga pag-alagad sa katawhang Pilipino ug paghalad sa kinabuhi sa kadaugan sa demokratikong rebolusyon sa katawhan.