Agsusumbangir ti pammabalaw iti “deklarasyon ti kooperasyon” ti University of the Philippines (UP) ken Armed Forces of the Philippines (AFP) a napirmaan idi Agosto 8. Dakkel a panangrabngis daytoy iti akademiko a wayawaya, segun kadagiti kritiko.

Ti panagserrek ti unibersidad ditoy a katulagan ket mangiduron iti UP nga agbalin a kasunsabo kadagiti nasaknap a panaglabsing iti karbengan-tao ken pulitikal a panangipawil nga ar-aramiden ti AFP, segun kadagiti agkedkedked ditoy. Pagbalbalinen daytoy a lehitimo ti agdama a panangipawil kadagiti kritikal a timek ken progresibo nga inisyatiba iti uneg ti unibersidad nga awagan ti AFP a pangta iti “nailyan a seguridad.”

Depensaan ti UP. Insayangkat dagiti estudyante ti UP-Diliman ti “First Day Fight” idi Agosto 20 tapno kundenaren ti adu a paay ti administrasyon ti unibersidad. Sinupyat da met ti panagkissay ti badyet iti edukasyon ken komersyalisasyon dagiti espasyo ken serbisyo iti unibersidad. Inlaksid da ti pannakibiang ti pulis ken militar kadagiti kampus daytoy. Naiyaramid met dagiti kapada a protesta iti dadduma pay a kampus ti UP iti Baguio, Manila, Laguna, Davao, Cebu ken Iloilo kadagitoy napalabas a lawas.