Isang buwan pa lamang mula nang maupo si Donald Trump bilang presidente ng United States of America, pero kaliwa’t kanan na ang kanyang sinuwag at sinibasib, katulad ng isang halimaw na hibang sa pag-angkin ng lahat para sa kanyang kaharian. Sa kanyang mga deklarasyon at hakbangin, inalis ni Trump ang maskara ng US bilang “tagapagpalaganap ng demokrasya,” at inilalantad ang tunay na mukha at kulay ng US bilang walang kabusugang imperyalistang kapangyarihan na sadlak sa krisis at desperadong isalba ang naglalahong imperyo.

Sa loob ng US, salamin ng lumalalim na krisis sa pulitika at paglakas ng tunguhing pasista, rasista at ultra-konserbatibo, malawakang niyuyurakan ng gubyernong Trump ang demokratikong karapatan ng mamamayang Amerikano. Sa utos ni Trump, ilampung libong kawani ng gubyerno ang walang sabi-sabing tinanggal sa trabaho, sa tabing ng “pagtitipid.” Pinakilos niya ang mga armadong ahensya ng estado para marahas na ikulong o palayasin ang milyun-milyong mga “iligal” na migrante sa US.

Sa halos lahat ng panig ng mundo, humaharap ang mamamayan at mga bansa sa mga panggigipit sa ekonomya at mga banta ng agresyon ng imperyalismong US. Ginagamit ni Trump ang pagpapataw ng taripa sa kalakalan, pagbawi o pag-ipit ng mga ayudang militar at pang-ekonomya, laban sa mga bansang nais niyang ipitin, pasunurin o paluhurin sa kanyang mga dikta.

Nagpataw si Trump ng karagdagang mga taripa laban sa mga produkto ng Canada, Mexico at China sa tangkang ipitin ang mga ito para ibigay ang kanyang gusto. Kasabay nito, idineklara ni Trump ang kagustuhan niyang ipailalim ang Canada bilang ika-51 estado ng US. Inianunsyo rin niya ang planong kunin ang kontrol sa Panama Canal mula sa Panama dahil diumano’y pinapaburan nito ang China. Lumilikha rin si Trump ng ingay sa balak niyang “bilhin” o sakupin ang Greenland.

Idineklara din ni Trump ang kanyang plano na “kunin ang kontrol” at “ariin” ang Gaza Strip, at palayasin ang lahat ng Palestino mula sa kanilang lupa at tahanan. Ito ay tahasang paglabag sa kalayaan at karapatan ng mga Palestino sa sariling pagpapasya. Inuudyok ni Trump ang Zionistang estado ng Israel na muling ituloy ang pambobomba sa Gaza, labag sa kasunduan sa tigil-putukan.

Kamakailan, ipinag-utos ni Trump ang 90-araw na suspensyon ng $64-bilyong mga programang pinopondohan ng USAID o US Agency for International Development. Ginagamit ni Trump ang gayong suspensyon upang lalong paluhurin ang mga atrasadong bansang nakasalalay nang malaki sa mga programa ng USAID. Kabilang sa ginigipit ni Trump ay ang mga programang pangkalusugan sa South Africa, na nais niyang paatrasin sa pagkundena sa Israel sa gerang henosidyo laban sa mga Palestino, at para pigilan itong magpatupad ng reporma sa lupa na babaklas sa kaayusan sa lupa ng dating rehimeng rasista.

Sa tulak ni Trump, sinimulan ng US at Russia ang negosasyon para diumano tapusin ang gera sa Ukraine. Lalong lumilinaw ngayon na ang gerang ito ay isang “proxy war.” Sinisisi ngayon ni Trump ang Ukraine na “sinimulan ang gera”, gayong ang katotohanan, matagal na ginamit ng US ang Ukraine para makipagsalpukan sa Russia. Sa pakikipagmabutihan ni Trump sa Russia sa usapin ng Ukraine, habol niya ang bentahe ng pagkontrol sa mga yamang mineral sa rehiyon, gayundin, ang lumikha ng lamat sa pagitan ng Russia at China, para sa estratehikong layunin ng US na ihiwalay ang China.

Sa ilalim ni Trump, patuloy ang mga pwersang militar ng US sa pagpapatatag ng malaking presensya nito sa Asia, partikular na sa palibot ng China, at sa pagkakasangkapan sa armadong pwersa ng Pilipinas at tutang gubyernong Marcos, para tuluy-tuloy na upatin ang sigalot sa China.

Sa pangambang puntiryahin ni Trump ang gubyerno ng Pilipinas ng katulad na panggigipit sa ibang bansa, nagkukumahog ngayon ang rehimeng Marcos na magpakitang-gilas sa bago niyang amo para patunayan ang kanyang katapatan sa imperyalismong US. Lalo pang pinahihigpit ni Marcos ang pagkakatali ng patakarang panlabas at kapakanan ng Pilipinas sa interes at heyopulitikal na adyenda ng kanyang imperyalistang among US na palibutan at pigilan ang lalong paglakas ng imperyalistang China.

Nitong nagdaang mga linggo, pinatindi ng gubyernong Marcos ang pagpapaypay ng apoy na kontra-China, sa pamamagitan ng pagdakip sa diumano’y mga “espiya” ng China sa Pilipinas (kahit pa malayang nag-ooperasyon sa Pilipinas ang mga ahente ng CIA, katulad ng bumagsak na eroplanong pang-espiya nito sa Maguindanao). Walang tigil din ang mga palabas na “pagtataboy” sa “halimaw” na barkong Coast Guard ng China sa West Philippine Sea (gayong wala itong imik nang dumaan ang dambuhalang USS Carl Vinson sa mismong karagatang teritoryal ng Pilipinas, nang pumasok ito sa pagitan ng Leyte at Mindanao, bago nag-istasyon sa Palawan).

Ipinakikita ng mga hakbangin ng gubyernong Trump ang desperasyon ng imperyalismong US na igiit ang sarili bilang pangunahing kapangyarihan sa buong mundo, sa kabila ng estratehikong paghina nito. Kinakatawan niya ang interes ng mga monopolyo kapitalistang Amerikano na naghahangad na palawakin ang saklaw ng impluwensya at kontrol ng US sa mga pinagkukunan ng likas na yaman, mga ruta sa kalakalan at larangan ng pamumuhunan sa iba’t ibang panig ng mundo.

Ang malulupit, mararahas at mapanalantang hakbangin ni Trump ay nag-uudyok ng malawak na paglaban sa kanyang paghahari. Ngayon pa lamang, mabilis na umiigting ang galit ng mga manggagawa at mamamayang Amerikano. Maging mga korte at ahensya ng gubyerno ay tumututol sa tiraniya ni Trump. Ang dumaraming mga rali sa iba’t ibang panig ng US ay tanda ng namumuong malaking daluyong ng protesta na tiyak na lalamon sa rehimeng Trump, sa malao’t madali.

Dapat maagap ding kumilos ang sambayanang Pilipino para labanan ang pagiging sunud-sunurang papet ng rehimeng Marcos, tutulan ang panghihimasok ng US, at labanan ang pagkaladkad sa Pilipinas sa mga sigalot na nililikha ng US para sa sarili nitong interes, laluna kontra sa karibal nitong China. Pag-alabin ang diwa ng patriyotismo ng sambayanang Pilipino para isulong ang digmang bayan upang ipaglaban ang tunay na kalayaan ng bansa, at wakasan ang kontrol at dominasyon ng imperyalismong US na siyang pinakamalaking ugat ng paghihirap at pagdurusa ng sambayanang Pilipino.