Nagapakig-isa ang Partido kag ang Bagong Hukbong Bayan sa nagahana nga pagkomemorar sang ika-52 nga anibersaryo sang National Democratic Front sa Abril 24. Ipasundayag kag saulugon naton ang mga nalab-ot kag kadalag-an sang NDF sa masobra lima ka dekada nga paghiusa sa pumuluyong Pilipino, sa pagtib-ong kag pagtiglawas sa ila pungsodnon kag demokratikong mga handum, kag pagsulong sang demokratikong rebolusyon sang banwa paagi sa inaway banwa.

Indi mahimutig ang dako nga pagka-signipikante subong sang pagkomemorar sa adlaw sang pagtukod sang NDF. Bilang pinaka-konsolidado nga bahin sang pungsodnon nagahiliugyon nga prente kag salsalon nga ubod sang patriyotiko nga prente sang pumuluyong Pilipino, tuman ka malahalon subong nga matadlong kag malig-on nga magtindog ang NDF. Ini sa atubang sang pagsingki sang pagpasilabot kag nagahugot nga kontrol sang imperyalismong US sa militar, pulitika, ekonomiya kag kultura sang pungsod, sa tunga sang ginpasingki sini nga kagamo sa imperyalismong karibal nga China. Dala sini ang wala sang tupong nga kahalitan, pag-antus kag peligro sa kahilwayan, kaluwasan kag dignidad sang pumuluyong Pilipino.

Dapat hugpungon sang NDF ang malapad nga paghiliusa sang pumuluyo batuk sa inutil nga “deterrence policy” ukon patakaran sang pagpakita sang mabaskog nga pwersang militar sang US para kuno punggan ang pag-atake sang China. Sa idalum sang patakaran nga ini, ginagamit sang militar sang US ang Balikatan kag wala-tuo nga mga war games, para ipwesto ang mga hinganiban kag tinawo sini sa lain-lain nga bahin sang pungsod. Katuyuan sini, indi ang punggan nga mag-atake ang China, kundi nga kugmaton kag garit-gariton ini.

Sentro subong sang pokus sang US ang Batanes kon diin ginpakat ang nagadamo nga misayl sini nga nakatutok sa China. Adlaw-adlaw man ang pagguwa-sulod sang mga higante nga barko pang-gyera sang US sa lain-lain nga bahin sang Pilipinas nga nagaganyat sang nagadamo nga barko sang China sa South China Sea kag exclusive economic zone sang Pilipinas. Ginabutong sang US sa Pilipinas ang mga armadong pwersa sang Japan, Australia, France kag iban pa nga alyadong imperyalistang pungsod.

Todo-todo ang pagyaob sang papet nga rehimen Marcos sa dikta sang US. Ginapagamit sini sa US ang AFP agud magserbe nga alalay sang mga pwersang miitar sang US. Largada nga ginagamit sang US ang Piiplinas bilang proxy sa ginahimo sini nga pagpanggarit-garit sa China. Nagapagamit ang traidor nga si Marcos sa US sa pagpanggamo-gamo kag pagsampok sa China, imbes nga tiglawasan sini ang interes sang mga Pilipino nga maghimo sang mainabyanon kag malinong nga relasyon sa kaiping nga pungsod nga China.

Dapat manguna ang NDF sa pagpabaskog sang pagpamatok sang pumuluyo sa dumuluong nga pagpangkawkaw kag paghari sa ekonomiya. Dapat magserbe nga mabaskog nga boses ini sa pagpamatok sa paggamit sang gobyernong Trump sa pamahog sang taripa batuk sa mga produkto nga gina-export halin sa Pilipinas, para mas nga buksan ang pungsod sa pagtambak diri sang mga sobra nga baligya sang US.

Dapat mabaskog nga batikuson sang NDF ang rehimen Marcos sa mga neoliberal nga patakaran pang-ekonomiya nga nagahatag sa mga dumuluong nga dalagko nga kapitalista kag kasosyo sini nga dalagko nga negosyo sang lubos nga gahum nga manghugakom sang kadutaan, suyupon ang dunang manggad sang pungsod, wasakon ang kapalibutan kag ilubong ang pungsod sa utang. Dapat sini nga sukton ang imperyalistang US kag neokolonyal nga estado sa pagpabilin nga atrasado ang ekonomiya kag lokal nga produksyon, kag pagpaantus sa masa sang pumuluyo.

Wala-puas subong ang saywar kag pangkultura nga kontrol sang imperyalismong US agud manipulahon ang utok kag panghuna-huna sang pumuluyong Pilipino. Gamit ang midya kag social media, ginapaguwa nila nga sila “abyan, kabulig kag alyado” sang pumuluyong Pilipino, kag ginatabunan ang patarasak nga pagtapak sang sobereniya sang pungsod. Kakunsabo ang rehimen Marcos, ginagatungan sang US ang Sinophobia ukon sentimyento nga kontra-China, kag ginasulit-sulit ang pagkabig sa pungsod bilang “kaaway” ukon “pamahog.”

Ini tanan kabahin sang nagasingki nga pangkalibutanon nga kagamo tungod sa paglagas sang imperyalismong US nga bag-uhon ang kaayusan sang kalibutan, agud liwat ibutang ang kaugalingon bilang solo nga superpower. Madasig nga naga-init ang kagamo nga ini sa tunga sang nagapadayon nga krisis sang pangkalibutanon nga sistemang kapitalista. Ginagamit sang US ang kusog-militar sini sa paghandum nga mangin iya ang malapad nga merkado kag mga kuluhaan sang importante nga mga mineral, kag punggan ang padayon nga pag-uswag kag paglapad sang gahum sang karibal sini nga China. Sa paglagas sang US, nagadako ang peligro sang inaway sa lain-lain nga bahin sang kalibutan.

Tuman ka kinahanglanon subong nga pabaskugon ang NDF kag ang patriyotiko nga prente sang pumuluyong Pilipino agud palapnagon ang panindugan para sa pungsodnon nga kahilwayan: kahilwayan gikan sa dumuluong nga pagpasilabot militar, kahilwayan pang-ekonomiya, sa pulitika, kag sa kultura. Dapat sikwayon kag pakigbatuan ang neokolonyal nga estado sang mga nagahari nga sahi nga ginagamit sa pagpang-ipit sa makipungsodnon nga handum sang pumuluyo.

Dapat pabaskugon ang NDF paagi sa pagpabaskog sang mga alyado nga organisasyon sini nga nagahiliusa kag nagabuligay agud masulong ang inaway banwa. Kinahanglan nga pabaskugon ang kahublagan propaganda agud pukawon kag pasagrabon ang espiritong patriyotiko sang mga mamumugon kag mangunguma, pamatan-on estudyante, imol nga masa, kababaehan, manunudlo kag empleyado, kag iban pa nga demokratikong sektor.

Dapat pahugton kag palaparon pa sang NDF kag sang pungsodnon-demokratiko nga kahublagan ang pag-abot sini sa mga akademiko, tawong simbahan, mga abogado kag propesyunal, gagmay nga negosyante, kag tanan nga sektor nga dapat hugpungon sa idalum sang bandera sang kahilwayan. Dapat man pabaskugon ang relasyon sa mga upisyal kag tinawo sang reaksyunaryong militar kag pulis nga may sentimyento nga patriyotiko, kag engganyuhon sila nga magtindog batuk sa traidor nga rehimen Marcos nga ginapagamit ang AFP kag PNP sa imperyalismong US sa pagpanggarit-garit sa China, kag sa pagpang-ipit sa pumuluyong Pilipino nga nagahimakas para sa kahilwayan.

Dapat palaparon sang NDF ang relasyon sini sa tanan nga kahublagan kag organisasyon sa bug-os nga kalibutan nga nagapamatuk sa imperyalistang gyera. Dapat ini nga magbulig sa pagtukod sang malig-on nga haligi sang malapad nga kahublagan kontra-imperyalista kag hingalitan ang tanan nga kontradiksyon sa kubay sang mga imperyalista agud mabenepisyuhan sang malapad nga masa sang pumuluyo.

Ang pinakadako nga katungdanan subong sang NDF amo ang himuon ang tanan para sa pagsulong sang malawigon nga inaway banwa, ilabina ang pagpabaskog sang BHB kag liwat pagpapagsik sang armadong paghimakas kag rebolusyonaryong kahublagan masa sa kaumhan. Ang rebolusyonaryong armadong paghimakas sang pumuluyong Pilipino ang nagapanguna kag pinaka-epektibo nga dagway sang pakig-away agud punggan ang imperyalistang gyera nga ginasulsulan sang US, kag para agumon ang pungsodnon nga kahilwayan kag demokrasya.