Sunod-sunod nga ginpaguwa sang Sine Proletaryo kag Artista at Manunulat ng Sambayanan (Armas)-Southern Tagalog ang isa ka bag-o nga serye kag album sining Abril. Gintalakay sa mga ini ang kabuhi sang mga rebolusyonaryo kag ila matutom nga pagtinguha agud itib-ong ang kahublagan panadlong.

Sadtong Abril 8, ginlunsar sang Sine Proletaryo ang pinakabag-o nga bidyo serye sini nga “Buhay Gerilya” kon diin ginapakita ang kabuhi kag paghimakas sang mga rebolusyonaryong hangaway kag kumander sang Bagong Hukbong Bayan (BHB) kag mga katapo sang rebolusyonaryong organisasyon. Katuyuan sang serye nga ipakita ang pagtilaw sa rebolusyon, kag adlaw-adlaw nga eksperyensya sa pagpanday sang isa ka bag-o nga katilingban.

Una nga ginhinun-anon sang Sine Proletaryo, sa pakigbuligay sa Opisina sang Tigpamaba sang Melito Glor Command, si Comrade Kathryn, opisyal sa pulitika sang BHB-Southern Tagalog. Gina-engganyo sang Sine Proletaryo ang iban pa nga yunit sang BHB kag mga organisasyon masa nga magpadala sang ila mga bidyo kag hinun-anon nga ipaunod sa serye.

Sadtong Abril 11, ginpaguwa sang Armas-ST ang album nga Ampatin (2025) nga naga-unod sang walo ka kanta, isa ka instrumental kag isa ka minus 1. Ang mga pyesa diri nagalaragway sang inspirasyon nga tuga sang subong nga kahublagan panadlong nga ginalunsar sang Partido.

Sa pihak sang masingki nga atake sang estado, napaguwa ang album sa pagbinuligay sang gerilyang produksyon sa sonang gerilya kag syudad. Gina-engganyo sang grupo ang tanan nga ipalapnag ang mga kanta sa album. “Tun-an, ipasundayag, kantahon sa mga pagtililipon kag iban pa nga pareho nga aktibidad. Ipalapnag man ang kopya nga digital sa tanan nga posible nga alagyan,” siling nila.

Mada-download ang bidyo kag album sa website sang PRWC (www.philippinerevolution.nu).