Nakikiisa ang Partido at ang Bagong Hukbong Bayan sa napipintong paggunita ng ika-52 anibersaryo ng National Democratic Front sa Abril 24. Itanghal at ipagdiwang natin ang mga nakamit at tagumpay ng NDF sa mahigit limang dekadang pagbubuklod sa sambayanang Pilipino, sa pagtataguyod at pagkakatawan sa kanilang pambansa at demokratikong mga hangarin, at pagsusulong ng demokratikong rebolusyong bayan sa pamamagitan ng digmang bayan.

Hindi mapasusubalian ang malaking kabuluhan ngayon ng paggunita sa araw ng pagtatag ng NDF. Bilang pinakakonsolidadong bahagi ng pambansang nagkakaisang prente at bakal na ubod ng patriyotikong prente ng sambayanang Pilipino, napakahalaga ngayon na tumindig nang matuwid at matatag ang NDF. Ito ay sa harap ng tumitinding panghihimasok at humihigpit na kontrol ng imperyalismong US sa militar, pulitika, ekonomya at kultura ng bansa, sa gitna ng pinasisidhi nitong sigalot sa imperyalistang karibal na China. Hatid nito’y walang kaparis na pananalanta, pagdurusa at banta sa kalayaan, kaligtasan at dignidad ng sambayanang Pilipino.

Dapat buuin ng NDF ang malapad na pagkakaisa ng sambayanan laban sa hungkag na “deterrence policy” o patakaran ng pagpapakita ng malakas na pwersang militar ng US para diumano pigiling umatake ang China. Sa ilalim ng patakarang ito, ginagamit ng militar ng US ang Balikatan at kaliwa’t kanang mga war games, para ipwesto ang mga sandata at tauhan nito sa iba’t ibang panig ng bansa. Layunin nito, hindi ang pigiling umatake ang China, kundi ang sindakin at upatin ito.

Sentro ngayon ng pokus ng US ang Batanes kung saan ipinapakat ang dumaraming misayl nito na nakatutok sa China. Araw-araw rin ang paglalabas-masok ng mga higanteng barkong pandigma ng US sa iba’t ibang panig ng Pilipinas na umaakit ng paparaming barko ng China sa South China Sea at exclusive economic zone ng Pilipinas. Hinihila ng US sa Pilipinas ang mga armadong pwersa ng Japan, Australia, France at iba pang alyadong imperyalistang bansa.

Todo-todo ang pangangayupapa ng papet na rehimeng Marcos sa dikta ng US. Ipinagagamit nito sa US ang AFP para magsilbing alalay ng mga pwersang militar ng US. Buong-largang ginagamit ng US ang Pilipinas bilang proxy sa ginagawa nitong pang-uupat sa China. Nagpapagamit ang traydor na si Marcos sa US sa panggigiri at pagsabong sa China, sa halip na katawanin ang interes ng mga Pilipino na makabuo ng mapagkaibigan at mapayapang ugnayan sa kalapit-bansang China.

Dapat manguna ang NDF sa pagpapalakas ng pagtutol ng sambayanan sa dayuhang pandarambong at paghahari sa ekonomya. Dapat magsilbing malakas na boses ito ng pagtutol sa paggamit ng gubyernong Trump sa banta ng mga taripa laban sa mga produktong inaangkat mula sa Pilipinas, para lalong buksan ang bansa sa pagtatambak dito ng mga sobrang kalakal ng US.

Dapat malakas na batikusin ng NDF ang rehimeng Marcos sa mga neoliberal na patakarang pang-ekonomya na nagbibigay sa mga dayuhang malalaking kapitalista at kasosyo nitong malalaking negosyo ng higit na kapangyarihang mangamkam ng lupa, huthutin ang likas na yaman ng bansa, wasakin ang kapaligiran at ilubog ang bansa sa utang. Dapat nitong singilin ang imperyalismong US at neokolonyal na estado sa pagpapanatiling atrasado ng ekonomya at lokal na produksyon, at pagpapahirap sa masa ng sambayanan.

Walang-puknat ngayon ang saywar at pangkulturang kontrol ng imperyalismong US para sa manipulasyon sa isip at kamalayan ng sambayanang Pilipino. Gamit ang midya at social media, pinalalabas nilang sila’y “kaibigan, katuwang at alyado” ng sambayanang Pilipino, at pinagtatakpan ang walang-habas na pagyurak sa kasarinlan ng bansa. Kasabwat ang rehimeng Marcos, ginagatungan ng US ang Sinophobia o sentimyentong anti-China, at inuulit-ulit ang pagturing sa bansa bilang “kalaban” o “banta.”

Lahat ito’y bahagi ng tumitinding pandaigdigang sigalot bunga ng paghahabol ng imperyalismong US na baguhin ang kaayusan ng mundo, upang muling iluklok ang sarili bilang solong superpower. Mabilis na umiinit ang sigalot na ito sa gitna ng nagpapatuloy na krisis ng pandaigdigang sistemang kapitalista. Ginagamit ng US ang lakas-militar nito sa paghahangad na mapasakanya ang malalawak na pamilihan at mga pinagkukunan ng mahahalagang mineral, at pigilin ang patuloy na paglago at paglawak ng kapangyarihan ng karibal nitong China. Sa paghahabol ng US, lumalaki ang banta ng digmaan sa iba’t ibang panig ng mundo.

Kailangang kailangan ngayong palakasin ang NDF at ang patriyotikong prente ng sambayanang Pilipino para palaganapin ang paninindigan para sa pambansang kalayaan: kalayaan mula sa dayuhang panghihimasok militar, kalayaang pang-ekonomya, sa pulitika, at sa kultura. Dapat itakwil at labanan ang neokolonyal na estado ng mga naghaharing uri na ginagamit sa pagsupil sa makabayang hangarin ng taumbayan.

Dapat palakasin ang NDF sa pamamagitan ng pagpapalakas ng mga alyadong organisasyon nitong nagkakaisa at nagtutulungan para sa pagsusulong ng digmang bayan. Kailangang palakasin ang kilusang propaganda upang pukawin at pag-alabin ang diwang patriyotiko ng mga manggagawa at magsasaka, kabataang estudyante, masang maralita, kababaihan, guro at kawani, at iba pang demokratikong sektor.

Dapat pahigpitin at palawakin pa ng NDF at ng pambansa-demokratikong kilusan ang abot nito sa mga akademiko, taong-simbahan, mga abugado at propesyunal, maliliit na negosyante, at lahat ng sektor na dapat bigkisin sa ilalim ng bandera ng kalayaan. Dapat ding palakasin ang ugnayan sa mga upisyal at tauhan ng reaksyunaryong militar at pulis na may sentimyentong patriyotiko, at hikayatin silang tumindig laban sa traydor na rehimeng Marcos na ipinagagamit ang AFP at PNP sa imperyalismong US sa pang-uupat sa China, at sa panunupil sa sambayanang Pilipinong nakikibaka para sa kalayaan.

Dapat palawakin ng NDF ang ugnayan nito sa lahat ng kilusan at organisasyon sa buong mundo na tutol sa imperyalistang gera. Dapat itong tumulong sa pagbubuo ng matibay na gulugod ng malawak na kilusang anti-imperyalista at samantalahin ang lahat ng kontradiksyon sa hanay ng mga imperyalista para sa kapakinabangan ng malawak na masa ng mamamayan.

Ang pinakamalaking tungkulin ngayon ng NDF ay ang gawin ang lahat para sa pagsusulong ng matagalang digmang bayan, laluna ang pagpapalakas ng BHB at pagpapanibagong sigla ng armadong pakikibaka’t rebolusyonaryong kilusang masa sa kanayunan. Ang rebolusyonaryong armadong pakikibaka ng sambayanang Pilipino ang pangunahin at pinaka-epektibong anyo ng paglaban para sagkaan ang imperyalistang gera na inuupat ng US, at para kamtin ang pambansang kalayaan at demokrasya.