Tallo a kaso ti panagaresto, maysa a kaso ti panagbomba ken dagiti kaso ti sarbeylans ken panaglipit ti naiyulat a panaglabsing iti karbengan-tao daytoy napalabas a dua a lawas.

Idiay Southern Leyte, inaresto dagiti pwersa ti estado ti agtawen 61 a ni Felixberto Consad, myembro ti Piston idiay Butuan City, iti balay na idiay Sogod idi Agosto 14. Indarum da ti kaso a pammapatay ken impan da idiay Sogod Police Station. Ni Consod ket agindeg idiay Southern Leyte tapno liklikan ti panaglipit ti militar.

Idiay Rizal, dua a residente ti Sityo Rawang, Barangay Tandang Kutyo, Tanay ti naaresto idi Agosto 29. Dagiti biktima ket naaresto gapu iti panagtakder da, kadwa da ti komunidad, laban iti panagkamkam ti daga ti pamilya a Chua-Tan ken Sta. Lucia Corporation iti erya.

Idiay Camarines Norte, kinemmeg dagiti soldado ti 16th IB ni Faye Margarette Tallow, maysa nga organisador dagiti mannalon, iti Barangay Malibago, Labo idi Setyembre 4. Rineyd ti militar ti balay a pagdagdagusan ni Tallow ken idiay da a pinidot. Agingga tatta ket saan pay nga imparparang ti militar isuna.

Idiay Cavite, pinilaan ti pinarbo a kaskaso ti 2nd CMO Battalion da Jojo Mercado, Miriam Villanueva ken dadduma pay a residente ti Purok 5, Barangay Langkaan 1, Dasmariñas gapu iti panangpatalaw da kadagiti soldado iti komunidad ken panagkedked da a lakwan dagiti elemento ti batalyon kadagiti tersena da.

Panagbomba. Riniribuk ti napipigsa a bomba, kanyon ken panagistraping dagiti yunit ti AFP ti kinaulimek ken oras ti panaginana dagiti residente ti Tapaz, Capiz idi alas-2:30 ti parbangon ti Agosto 22. Nangitunda daytoy ti nakaro a buteng ken nangpwersa iti sumagmamano a pamilya a pumanaw manipud iti komunidad da.

Panagtiktik. Kinasarita ken tiniktikan ti maysa a pulis dagiti kameng ti Pamalakaya-Navotas idi maudi a lawas ti Agosto. Dagiti ahente a pulis a nagpakaammo a taga-Bureau of Fisheries and Aquatic Resources ket dimmawat ti impormasyon ken nangidyaya ti kwarta kasukat ti impormasyon kanaig iti grupo. Tapno ibunannag ti panagtiktik, kinompronta ti grupo ti pulis idi Agosto 31 iti maysa a restawran.